بمناسبة المؤتمر العام للحزن الوطنى إليكم آخر قصائد شاعرنا الفحل _والفحوله هنا أقصد بها قوته كشاعر وليس غباءه كحاكم علشان محدش يقولنا كلام واللى عايز ياخدها بالمعنى التانى ماليش دعوه يخلص اموره مع أمن الدوله -إلى شعبه الحبيب0
إسمع واتمزج ..........قول يا شاعر قول
يا شعبي حبيبي يا روحي يا حبيبي ياحاطك في جيبي يابن الحلال
يا شعبي يا شاطر يا جابر خواطر يا ساكن مقابر وصابر وعال
يا واكل سمومك يا بايع هدومك يا حامل همومك و شايل جبال
يا شعبي ياللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضد تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغل لي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك وأذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال
القصيده نقلا عن موقع مصريين بلا حدود
ماذكروش إسم الشاعر
فاللى يعرف ياريت يفيدنا
متهيألى هى الشاعره إيمان البكري
2 ليف يور كومنت هير بليز:
لاء برضه مش الشاعره ايمان البكرى
هى القصيدة دى كانت اتنسبت للشاعر احمد فؤاد نجم
لكنه قال انها ما تخصوش
واللى سمعته اصلا ان اللى نزلها واحد مجهول ومش عايز يقول اسمه
بس بصراحة هو مغلطش
الراجل كلامه عين العقل
حلوة اوى العصيدة دى .. انا برضو سمعت انها لاحمد فؤاد نجم بس مش متأكد .. مش نفس اسلوبه
Post a Comment