Friday, September 29, 2006

فاصل من العك الحياتى

تخيل يا محترم أن صينية الكنافة ما اتلسعتش 0

و كما قال أحد العظماء في إعلان عن بوتاجاز لا أذكر أسمه (ساميه ما لسعتش البامية) أردت أن اصرخ أنا الآخر وأقول أمي ما لسعتش الكنافة مع الوضع في الاعتبار توفيق الله سبحانه وتعالى ودعاوى التراويح وصلاة الفجر حتى تمر الصينية بسلام من باب الفرن إلي باب المعدة دون حدوث أي مضاعفات جانبيه0

بس الدنيا لسه بتلسع صينية الكنافة ولسه مصممه تعكنن على الواحد
و كأصغر دوبلير وقع في أيدي فريد شوقي في فيلم رصيف نمره خمسه شعرت بكمية آلام أوجعتني لفترة وأفقدتني الإحساس لمده لا يعلمها إلا الله0

كام واحد قعد يقولى يا كئيب يا معقد؟؟؟

كتيييييييييييييييييير
وكم من رغبه مكبوتة كانت تتصارع داخلي للطشهم بالقلم مع فاصل من شتيمة يعاقب عليها القانون 0
و الكبت وحش والضغط بيعلى و احتمال حدوث جلطه في السن الصغيرة بيزيد0
وبعدين؟؟؟؟؟؟؟؟؟؟؟
--------------------------------------------------------------
ما أنا لازم ابتسم في وش الناس برده
الابتسام في وجه أخيك صدقه
طب لما ابتسم وأنا قرفان مش تبقى قلة أدب ونفاق و رياء وحليطه وموالسة لنفسي الملكومه فى معاميعها فضلا عن أن المنافق أخرته سوده
وبعدين ؟؟؟؟؟؟؟؟؟؟
----------------------------------------------------------------
أية اللي يخليني أقف أتفرج على فاترينة فيها تحف صيني؟
بجهز؟
لا غلط.....الصيني بيبقى على العروسه
طب ليه؟
ممكن تقول ترتيب قدري يسمح لك برؤية شخص محبب إلي قلبك مكروه لدى عقلك يؤدى بك إلى الجلوس على كرسى البلكونه في تلك الليلة ألليلاء مع جلسة قهر ذاتي وجلد معنوي تستخلص منها انك فسل وتافه0


عك في الحياة يشبه طبيخ باكينام لعريسها الهلق في تانى يوم جواز0
كلام يتفهم غلط0
وواحد يقولك نأسف لانقطاع الخط....وينفضلك وياخد تليفون تانى0
و روح تموت بين ايدك ...و أنت عاجز ولا تقوى على فعل شىء غير تبادل نظرات مع عينيه المليئة بألم عظماء لا يسمع أحد صوت أوجاعهم وتوصيل اللبن بسكر إلى فمه و دعاء له بالموت إذا كان في ذلك راحة له...و شعور عبيط عند استجابة الدعاء0

حبة سعادة انسحابيه أقرب للهروب..........يقابلها شد للأستك ورجوع إلى مكانك أكثر هما0
محاولات لصنع البهجة تنتهي بدراما المال والبنون0

حاله من القرف من قلة أدب علنيه من مدونين تقمصوا دور العلمانيين ويروا فى ذلك مدعاه للفخر0
أحدهم يفضل التزوج من أمرأه غير محجبه ويرى فى حديث بنت عن الجنس تحرر من مجتمع متحجر0
لا أجد لفظ لائق أنعته به لكنى أذكره بأهمية أريال الراديو لالتقاط نجوم أف أم0
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

حالة انعدام ثقة وناس بتضيع فرص عمرها وهى مش واخده بالها و ناس زي المزدوج فى مازنجر بوشين0

في النص فيه ناس محترمة تفتكرهم بكل خير0
وناس محترمة تفتكرها بنص خير0
و ناس بتستدعى مراكز النسيان علشان تخلص من صورها0
و حبة أنانية تمنع انتقاد الذات0




ووجع شخصي و ابتسامه دبلوماسية وناس بتسأل مالك وناس ما بتسألش وناس أنت مش عايزهم يسألوا و ناس ما بتراعيش إحساسك وناس بتلتمسلهم الاعذار0

قدر كبير من التتنيح والفرجه و رصد الاحداث0
وشريط السينما بيعدى قدام عينيك و لقطات كتيره و الكاميرا بتاخد كلوز على وش ساعات بيضحك وساعات بيبكى ساعات بيبتسم وساعات بيكشر وساعات كتير من غير ملامح0

قدر كبير من اتخاذ وضع الجنين0
و تساؤل لا ينتظر اجابه
who cares???

والبعض يسخر و يقول الله يرحمه مات فى الغربه علشان معرفش يقول
water


Thursday, September 28, 2006

جملة اعتراضية

والله زمان .... يا رمضان
والله زمان يا - دموع - رمضان

Saturday, September 23, 2006

اول يوم

الجامعة من بعيد - زمنيا - تبدو اجمل كثيرا ، كأي شيء اخر ، الزمن له قدرة فائقة علي تنقية اي ذكري من شوائبها ، يتداعي الي ذهني شطرة لمحمود درويش :
لكن الذكري
مثل حدادين ممتازين
تصنع من حديد تافه
قمرا
الجامعة ، اول يوم دراسة حيث كل شيء واضح ، و الطرق مرسومة علي الارض و الجدران ، مجموعة من الطلبة يرتدون ثيابا تقليدية ، مقطبي الجبهات في معظم الاحيان -علامة علي التركيز الشديد اكثر منها علامة علي الشر - مسرعي الخطي في نشاط ، هذا طريق يؤدي الي لافتات في كل مكان من الجدران ، خطبة حماسية ساخنة ، مشادة كلامية -او اكثر - مع الامن ، قهر ، ليالي سوداء طويلة في غرفة مظلمة و استجواب ثم عودة الي ساحة المعركة من جديد ، الاذان في مالطة لا تتبعه - في الغالب - اقامة للصلاة ....
اربعة بنات يقفون في المنتصف ، تستطيع تعريف مكان المنتصف من مكان وقوفهن ، انه الكان الذي يجب ان يمر منه الجميع ، و تتلاقي عنده عيون كثيرة و تعليقات متباينة ، ففي الجامعة حيث كل شيء واضح و الطرق مرسومة علي الارض و الجدران اربعة بنات لهن ملامح واضحة ، شعر مفرود و عيون تم توضيحها جيدا و فم جميل يقول كلاما واضحا خفيفا - خفيف جدا - الوان الملابس واضحة ، ضحكات تتلعلع و الرسالة واضحة ، نحن هنا ، و ننصب انفسنا ملكات لجذب الاهتمام ، لا ازعم قراءة الافكار لكني ازعم ايضا -كرأي شخصي علي الاقل -انه بالابحار في مياه افكارهن فان القاع يبدو واضحا جدا و الفراغات كبيرة ....
حقيبة ، مشية سريعة اتجاه واحد الي المدرج ، انه الجمهور المفضل لدي الاساتذة ، طالب يحاول ان يكون متفوقا ،ة هو علي الاقل يبدو كذلك ، مقطب الجبين ايضا ، و هو يبدو الان فقط منمقا قليلا ، لاننا - بالطبع - اول يوم دراسة ، يصافح احد الزملاء ، يتكلم متعجلا ، يبدأ في كراهية الزميل لأنه تجاوز وقته بالفعل و ربما اراد ايضا ان يتجاوز مجهوده طالبا مساعدة دراسية ليس لها وقت و هي عامة غير مريحة ، هو قنبلة موقوتة للاحباط ، ربما ....
ذوو البدل الرسمية الانيقة - هم في العادة لا يبدون كذلك لكنها مراسم اول يوم دراسة ، بابتسامة انيقة يوزعون اوراقا انيقة ايضا تتحدث عن مزايا الجامعة الانيقة و اماكن هامة يجب ان تزورها حتي الثمالة ، و انجازات انيقة للعميد الانيق و الادارة الانيقة ، يوزعون ايضا مذكرات بها امتحانات منمقة جدا حتي انها ستصبح جزءا كبيرا متن حجم ذكرياتك ، يتكلمون عن بلد و دراسة و اساتذة و نشاط ، الخيال كم هو جميل ....
حشو الكلية ، ذوو الملابس المميزة الواضحة ، الالوان واضحة ، الكلمات واضحة ، الافكار واضحة و خفيفة -جدا - يملئون الفراغات الجميلة خارج المدرجات ، يصنعون الحركة في الطرقات و الكافتريا و عقول الفتيات ...
متخللو الفراغات ، شاردو الذهن ، فرادي غالبا ، تجدهم عند مجلات الحائط ، لوحات معارض الرسم علي الجدران ، ضحكات واضحة احيانا او اكتئاب واضح ايضا و سخرية قاتلة من كل شيء ....
في ركن الكافتريا البعيد صباحا ، اول يوم دراسة ، حيث كل شيء واضح و الطرق مرسومة علي الارض و الجدران ، زهرة حائط تشرب القهوة في صمت و ابتسامة لاسعورية بطرف الفم تاتي من بعيد - زمنيا - حيث هذا الواقع هو ذكري ، و تكتب سطورا للزمن ....

اهلا رمضان


كل سنة وانتوا طيبين رمضان بكرة

Friday, September 22, 2006

فـَرَمَان ديكتاتوري

ياااااا شعب المدونات الحبيب المهاود... كل عام و انتم طيبين
قرار ديكتاتوري رقم 1
تقرر الآتي بخصوص المدون مورو العضو بهذه المدونة لتبقي سويعات على الشهر الكريم
بند 1
أن يعيش كالغريب أو عابر السبيل طووول الشهر
أن يشتري أو يعلق فانوساً رمضانيا في بلكونته لإيقاظ فرحة الطفل المدفونة في عماميقه
أن يقوم بأعمال فيها إذلال للنفس و كسر للكبرياء من الخدمات المختلفة
أن يراعي أنه يمكن يكون آخر رمضان يعدي عليه
بند 2
يتم استبدال عينيه بعينين طفل بتكتشف الكون لأول مرة ليتفكر في خلق الله و ليرى الأمور من جانبها المشرق
يتم استبدال المخ بذهن صافي انتُزع منه مخاوف المستقبل و دوائر التفكير المغلقة ولا شئ غير الجنة و إنه يكون أحلى رمضان في حياته
يتم استبدال اللسان بلسان طيب رطب بالذكر و يعف عن اللغو و الحرام
يتم استبدال القلب بقلب أبيض حليب مِسامح مافيهوش غير حب اللي خلقه
يتم استبدال اليدين و الساقين بغيرهم أكثر قوة لإعانته على الخير و التراويح و القيام
هذا للعلم و يجري التنفيذ منذ آذان المغرب ليوم السبت إن شاء الله
ملحوظة: للإعتراض..... اضرب دماغك في الحيط
!انتهى البيان

؟؟؟؟؟؟؟؟؟؟

نبتدى الاجابة بس يارب الحق اخلص قبل ما الورقة تتسحب منى بعد انتهاء زمن الامتحان

س 1 : هل انت عقلانى اكثر ام عاطفى ؟

اممم .... عقلانى معظم الوقت وعاطفى احيانا ... بس مؤخرا ابتدت معدلات العاطفية ترتفع شوية
س 2 : صف شخصيتك فى خمس كلمات ؟

بحب المغامرة والتغيير .... متمردة... كائن رحال ....طاققة شوية ... باعيش بالناس

س 3 : اذا كان لكل انسان شبيه من الحيوان , اى حيوان يشبهك ؟

ودى محتاجة سؤال .... القطة طبعا ... ومش اى قطة .. القطة البلدى .. لما تبقى مبسوطة تبقى هادية ولذيذة بس لما حد يضايقها او يحب ياخد حاجة منها تلاقيها طلعت ضوافرها وخدت حقها

س 4 : ماهو لونك المفضل ؟

الاحمر ... لون كده بحسه مليان حيوية

س 5 : هل انت اجتماعى اكثر ام منعزل ؟

وده كلام ... اجتماعى 100 %

س 6 : ماذا يشكل اصدقائك بالنسبة لك ؟

كل حاجة فى الدنيا .... ماقدرش اعيش ولا ثانية من غيرهم... هم اللى ممكن افرح معاهم وليهم .. وهما اللى ممكن احزن قدامهم ... واليوم اللى هاخسر فيه حد منهم هايكون يوم موتى

س 7 : هل انت مرتبط بعائلتك ؟

الى حد ما

س 8 : هل انت عصبى ام هادئ ؟

اه ... جينا بقى للاسئلة المحرجة .... هو انا بكون عصبية احيانا وممكن اكون هادية احيانا

س 9 : هل تفضل فصل الشتاء ام الصيف ؟

انا بعشق الشتا ... والمطروالرعد .. وكوباية النسكافية لما تمسكها عشان تستمد منها الدفا فى عز السقعة
... والمشى تحت المطر ...والكأبة اللى بتبقى موجودة فى الجو..وزى ماغنى على الحجار ...لما الشتا يدق البيبان .. لما تنادينى الذكريات

س 10 : متى اخر مرة بكيت فيها ؟ ولماذا ؟
امبارح ... لما حسيت انى فقدت صديق عزيز عليا
اطلب من التالى اسماؤهم حل التاج
بقية المتكاظية
الحمد لله خلصت والجرس بيرن والوقت بتاع الامتحان بنتهى... عقبال بقية الامتحانات

انا هنا

س1:هل انت عقلانى أكثر أم عاطفى؟
عاتــفية

س2:صف شخصيتك فى خمس كلمات؟
متمردة اندر كونترول .... مهزوزة .... ادفع عمري للي بحبهم ..... ملولة لدرجة الملل ...غاوية سفر ... اكتر من خمسة؟

س3:اذا كان لكل انسان شبيه من الحيوانات،أى حيوان يشبهك؟
اضحكوا زي ما تحبوا .... بيجاسوس من اصل حمار

س4:ما هو لونك المفضل؟
الابيض

س5:هل أنت أجتماعى أكثر أم منعزل؟
اجتماعية بشكل مرضي بس مش كل وقت

س6:ماذا يشكل أصدقائك بالنسبه لك؟
اايوووووه .... حاجات ياما ...

س7:هل أنت مرتبط بعائلتك؟
تم فطامي بفعل الزمن

س8:هل أنت عصبى أم هادىء؟
مؤخرا بقيت اكتر هدوءا , لكن عادة بطلع وانزل على مافيش

س8:هل تفضل فصل الشتاء أم الصيف؟
بحب هوا العصاري في الصيف والمطر والرعد والبرق في الشتا لكن ما بحبش الطينة , والبدرية في اي وقت

س9:متى أخر مره بكيت فيها ؟ولماذا؟
يوم حادثة الواد اخويا ... افتكرته لما طوله كان نص متر قبل ما ربنا ينفخ في صورته وابقى مش جايبة كتفه

أطلب من ألاتى أسماؤهم حل التاج
كلكم
س1:هل انت عقلانى أكثر أم عاطفى؟
عاطفية.. بس بضرب عاطفتي بالجزمة وابقي عقلانية
س2:صف شخصيتك فى خمس كلمات؟
ترمومتر عالي الحساسية..واحساس مزمن بالذنب"ست كلمات بس عدوها"
س3:اذا كان لكل انسان شبيه من الحيوانات،أى حيوان يشبهك؟
الانسان نفسه حيوان ناطق
س4:ما هو لونك المفضل؟
الازرق ...برده
س5:هل أنت أجتماعى أكثر أم منعزل؟
اصلا اصلا منعزلة بس الظروف خلتني اجتماعية
س6:ماذا يشكل أصدقائك بالنسبه لك؟
هماالناس اللي متكسفش اني اوريهم شرابي المقطوع
س7:هل أنت مرتبط بعائلتك؟
بصورة زائدة
س7:هل أنت عصبى أم هادىء؟
عصبية في البيت..لوح تلج بره
س8:هل تفضل فصل الشتاء أم الصيف؟
دايما بقول الشتا سقعان هتقل في الهدوم..لكن لو حران مش معقول هتطلع من هدومك!!!!
س9:متى أخر مره بكيت فيها ؟ولماذا؟
امبارح ...عشان حسيت ان في حد بيحاول يقرطسني
أطلب من ألاتى أسماؤهم حل التاج
أى حد قرأ التاج ده يجاوب...ويكرره عشر مرات

تاج تانى علشان خاطر الناس المحترمه

ثلاثة مدونين نحترمهم طلبوا منا التاج ده
وهم بترتيب الطلب
واحنا تحت الامر
س1:هل انت عقلانى أكثر أم عاطفى؟
حبه كده وحبه كده...ممكن تقولوا متكاظى
س2:صف شخصيتك فى خمس كلمات؟
هلق(بضم الهاء واللام وتسكين القاف....وأسألوا زوردياك عن معناها)..طيب احيانا...لئيم أحيانا...عبيط أحيانا...جدع فى بعض الاوقات..هلامى الكينونه
س3:اذا كان لكل انسان شبيه من الحيوانات،أى حيوان يشبهك؟
أى كائن عصوى ...لكن اللى فعلا بحس أنى شبهم.... قراميط وادى الفوسفات
س4:ما هو لونك المفضل؟
الازرق ...كفايه انه لون البحر والسما
س5:هل أنت أجتماعى أكثر أم منعزل؟
اجتماعى لكننى بدأت أتحول لحسن الهلالى وهو فى السجن
س6:ماذا يشكل أصدقائك بالنسبه لك؟
هما الناس اللى بعكنن عليهم وبيعكننوا عليه وهما اللى بفرح معاهم وهما اللى بكتئب معاهم وهما اللى بيفضفضولى وبفضفضلهم وهما اللى بشتمهم وبيشتمونى وهما الناس الوحيده اللى بتستحملنى فى أيام لونها بتنجانى...وهما اللى بيدعوا عليه وهما بيقروا الكلام ده
س7:هل أنت مرتبط بعائلتك؟
نعم
س7:هل أنت عصبى أم هادىء؟
الاتنين
س8:هل تفضل فصل الشتاء أم الصيف؟
الشتاء...حيث المطر والتكتكه والحاجه الدافيه وسكوت الشوارع....جو مثالى لقعده مع النفس
س9:متى أخر مره بكيت فيها ؟ولماذا؟
أمتنع عن الاجابه
أطلب من ألاتى أسماؤهم حل التاج
أى حد قرأ التاج ده يجاوب...ويكرره عشر مرات

Wednesday, September 20, 2006

بعض الحزن

بعض الحزن يحييك .. و بعضه يميتك

***
بعض الحزن .. يصهرك .. يذيبك كالشموع .. يسكبك كالماء ... يشتتك كالأمواج...
***
وبعض الحزن .. ينهيك .. يجففك كالأشجار.. يسقطك كالأوراق .. يذبلك كالورد...
***
وبعض الحزن .. يهدك .. يفجرك كالجبال .. يبعثرك كالرمال .. يشتتك كالأمطار....
***
وبعض الحزن .. يحرقك .. يشعلك كالأخشاب .. يتركك كالجمر .. يخلفك كالرماد....
***
وبعض الحزن .. يعميك .. يطفئ مصابيحك .. يسرق نورك .. يعتمك كالليل...
***
وبعض الحزن .. يرعبك .. يخيفك كالأشباح .. يلاحقك كالوحوش .. يهددك كالموت....
***
وبعض الحزن .. يخنقك يقيم في صدرك يسرق هواءك يكتم أنفاسك...
***
وبعض الحزن .. يحنيك كالأغصان .. يهشمك كالزجاج .. يهدك كالجدار...
***
بعض الحزن .. يشتتك .. يدمر عقلك .. يضيع عناوينك ..يطمس ذاكرتك...
***
وبعض الحزن.. يخدعك .. يزيف لك حقائق .. يمنحك السراب ويعلمك الوهم بلا حدود....
***
وبعض الحزن .. يصادقك .. يتودد إليك .. يلتصق بك .. لا يفارقك للأبد...
***
وبعض الحزن .. ينفعك .. يضيء لك العتمة .. ينقذك من أوهامك .. يريك حقيقة الأشياء...
***
وبعض الحزن.. يغسلك .. يطهرك من أوهامك .. يطليك بالواقع .. يعيد بناءك..
***
وبعض الحزن .. يلدك .. يخرجك من الحياة .. يمنحك فرصة أخرى وطريقًا جديدًا...
***
وبعض الحزن . .يغيرك .. ينسفك .. يقلب موازينك .. يعيد حساباتك مع نفسك..
***
وبعض الحزن .. يسجنك .. يبعدك عن العالم .. يخفيك عن الحياة.. يبقيكـ وحيدًا...
***
وبعض الحزن.. يقتلك .. يجمد إحساسك .. يوقف عجلة الزمان .. يفقدك شهية الحياة...
***
وبعض الحزن .. يعتقك من قيودك .. يمنحك حريتك .. ينهي استعمارهم لك...
***
وبعض الحزن.. يرممك .. يقيمك .. يملأ صدوعك .. يعيد رسم خرائطك..
***
وبعض الحزن .. مرآتك .. يواجهك في نفسك .. يكشف لك عيوبك .. يضع حقيقتك أمامك....
***
وبعض الحزن.. بلا طعم ولا نكهة

Friday, September 15, 2006

ايثاكا


متى عزمت على الارتحال الى ايثاكا
صل أن تكون الدرب طويله
فيها غمرة من المغامرات،غمرة من المعارف
لا تخش وحشا أو ماردا
لا تخش اله البحر الهادر،أو اله الزلازل
لن تصادف أيا منهم على الدرب
مادامت افكارك تحلق عاليا
والعاطفه تداعب روحك وجسدك
لن تصادف وحشا أو ماردا
لن تصادف أله البحر الهادر،او اله الزلازل
مادامت روحك تخلو منهم
وقلبك يبعدهم
***
صل أن تكون الدرب طويله
أن تكون نهارات الصيف كثيره
ستغمرك المتعه والفرح
متى عبرت موانىء تراها للمره الأولى
أنزل الاسواق الفينيقيه
وابتع أفخر البضائع
ابتع أمهات اللآلىء والمرجان والابنوس
ومن العطور الاكثرها اثاره
ابتع كل ما اعطيت من العطور الثمينه
زر ما شئت من المدن المصريه
لتستقى وتستقى العلم مناهله
***
احفظ ايثاكا فى ذهنك
فبلوغها الهدف
ابطىء فى ترحالك
فالأجمل أن تطول الرحله سنوات وسنوات
ان تجنح عند الجزيره وانت هرم
وقد اثراك حصاد الدرب
لا تتوقع أن تغدق ايثاكا الثروات عليك
فقد وهبتك الرحله الجميله
لولاها لما سرت على الدرب
نفدت عطاءات ايثاكا لك
وان وجدتها فى فقر
فلا تحسب أن ايثاكا قد خيبتك
يكفيك الحكمه التى بلغت
والتجربه التى عايشت
ولابد انك فهمت أهل ايثاكا
قسطنطين كافافى 1863_1933
مأخوذ من مقدمة الزهير لباولو كويليو

Thursday, September 14, 2006

نصير شمه


استجابة لرغبة عملائنا الكرام
وخصوصا المدونه الصديقه شيماء
نعلن عن توافر مقطوعة نصير شمه التى تجمع بين موسيقى حكايتى مع الزمان والف ليله وليله
بعد أن رأف أولد متكاظى بحالنا وجابها اخيرا
ومتنساش فنجان القهوه والكرسى الهزاز فى البلكونه بالليل (صعبه قوى حكاية الكرسى الهزاز دى)مش مشكله ابقوا اتصرفوا

Sunday, September 10, 2006

تـَغـيـيـر مَـسَـار

بصراحة (و إياك تثق في حد يبدأ كلامه بـ بصراحة!!)... كنت ناوي أنقل لكم ورقة كتبتها بيني و بين نفسي في آخر أيامي هنااااااك في الصحرا الغربية قُرب ليبيا كده (لمرضى الزهايمر: كان تدريب في شركة بترول) فيها اللي طلعت بيه من الرحلة الشاقة و المغامرة الغير محسوبة بالمرة دي... لكن رجعت أقوللي (انت هاتعيش؟! عامللي ابن بَطوُطَه يامشمش؟... احمد ربك انهم مستحملينك وسطهم أصلاً) ...اكتفيت بالصورة اللي شفتوها هي تتكلم عن نفسها صوت و صورة... بس كان فيه كلمتين قرأتهم هناك ( وسبحان الله كنت مواظب ع القراية هناك... من الغُلب) و حبيت نقراهم سوا...إذا سمحتم طبعاً...حِلو الكلام؟؟
--------------------------------------
لما تحلم...خد من الحلم اللي شفته بذرته...و ازرعه قدام عينيك
قٌم عليه..اعتني بيه..احرسه...و ارويه عرق من نور عينيك
راح يفرع...و الثمر يملا ايديك
بس احلم..و أما تحلم..اوعى م الأيام تخاف..اوعى منها تستحي
مهما كانت أو تكون
دا اللي خاف...حلمه مات
و اللي ما شد اللجام...وامتطى ضهر الحصان
عُمره ما يركب حصان
بس إحلم
...

السطور لـ فريد رمضان مجاهد
كتاب: ايه اللي يشفع في الخريف؟
من اصدارات الهيئة العامه لقصور الثقافة
moro

Thursday, September 07, 2006

ومنه ما يمس شغاف القلب

وقعت عينى على بعض الأبيات فى كتاب للمختارات الشعرية والخاص بكتابات فاروق شوشة
ها قدرك مرسوم فى طوق حمامة
او مدفون فى بطن الحوت
او سار حيث تجوب العاصفة الفلوات
وحيث الذر السابح فى الريح
فانظر قدرك
واتبع هذا النجم التائه
حيث يغيب
وحيث يلوح
امسك بزمام اللهب الجامح
حتى لا يشتعل العمر
واغلق نافذة الأسماء
فوجه الزمن قبيح
مثلك لا يبعد عن غايته
فارحل
هذى ارض الجذب
وهذا الغيث شحيح
واحمل
فيما تحمل من تذكاراتك
وجها
لم يطمسه غياب
لا تلغيه شواغل
او تقصيه مغانم وفتوح
يسطع فى لحظات اليأس
ويورق فى صحراء العمر
ويمسح من وجع
وجروح
لولاه
ولولا بعض منه تسرب فيك
ملامح
نبض خلايا
رفة روح
كنت ضللت المسعى
عفت العيش الخاوى
ما بين شتات
ونزوح
-- فاروق شوشة -- وجه لا يطمسه غياب

Coming Soon...

حارس الصحرا

Tuesday, September 05, 2006

تاج على راسى

دعاء غريب زنقتنا يا جدعان وبعتتتلنا التاج
وزى ما قالت هو دور وصايب الكل
وادينا حضرنا القلم الفرنساوى وبرينا القلم الرصاص و جيبنا المسطره والوالده بتدعى وما فاضلش غير ورقة الاسئله
حاسب من القلم الاحمر يا محترم
س1:هل انت مستكيف من مدونتك شكلا و موضوعا؟؟؟
والله موضوعا انا راضى عنه اما حكاية شكلا دى فليس فى الامكان اكثر مما كان0احنا كنا عاملينه الاول بمبى بس حسينا ان مواضعينا غامقه فضربناها كحلى0000بس مرحلة انى مستكيف دى لسه عليه سنه0
س2:هل تعلم اسرتك الصغيره بأمر مدونتك الصغيره؟
لا00اصلهم متوجسين خيفة منى اساسا هقولهم انى عامل بلوج ع النت هتبقى موال وابعد عن السياسه يا حبيبى 00ففضلت اشترى دماغى
س3:هل بتتكسف تقول لاصدقائك على مدونتك؟
لا ابدا00انا مش شايف مشكله00تقريبا صحابى كلهم عارفين
س4:هل شقلبت المدونه حياتك للاحسن؟ ادينى مثال
اه طبعا لانى كنت فى الاول بهرى وانكت مع نفسى دلوقتى فيه بشر بهرى وانكت معاهم00يعنى وفرت عليه تمن كشف الدكتور النفسانى
مش عارف كلمة ادينى مثال فكرتنى بفيلم عوكل اديلوه سلاح
س5:هل تكتفى بفتح صفحات من يعقبون بردود فى مدونتك؟ولا مقضيها وسارح سواح فى مدونات خلق الله؟
طبعا بفتح صفحات اللى بيردوا..واحيانا بسرح...واحيانا ما بفتحش خااالص ودى بتحصل لما ما بكون مخنوق من الدنيا
س6:ماذا يعنى لك عدد الزائرين ...هل تهتم بوضعه فى مدونتك؟
جينا للاحراج00والله كنت ناوى اظبط البلوج وادلعه واركب عداد زى التاكسى واجنط اللينكات والذى منه 00بس تقولى ايه فى الكسل وقلة الوقت00بس متهيألى كل ما يزيد الناس اللى بتطلع على مكاظيتك فى الحياه كل ما يكون احسن0
س7:هل حاولت تخيل شكل اصدقائك المدونين؟
ما حاولتش00بس لو هنشوفهم يبقى احسن
س8:هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟
السؤال ده مفروض ما يتسألش اساسا لان شهرة التدوين جاءت من انغامسه فى العالم اللى حواليه مش انفصاله
س9:هل ترى فائده حقيقيه للتدوين؟
هى نوع محترم جدا من الصحافه الشعبيه بيختلط فيها السياسه والادب والفن والثقافه فى منظومه جميله وخصوصا انها ازدهرت مع تنامى قوى سياسيه شعبيه زى حركة كفايه و شايفنكم ودورها المهم فى ازمة القضاه والاصلاح الدستورى جعل ليها فائده كبيره جدا خصوصا ان فيه كتير من المدونين كان بيشارك فى المظاهرات و حركات التغيير 00يعنى التدوين مرتبط بالشارع و الناس وده اللى بيديه قيمته الحقيقيه
س10:هل يزعجك وجود نقد فى مدونتك؟ام تشعر انه ظاهره صحيه؟
والله احنا بنرحب بالنقد ومابنزعلش علشان احنا عالم ديموقراطيين جدا00وعندنا شفافيه جدا00وفيه اشراف قضائى على البلوج
انت من حقك تعترض وان من حقى احطك فى السجن(جمله لعادل امام فى المنسى)0
س11:هل تخاف من بعض المدونات السياسيه وتتحاشاها؟هل صدمك اعتقال بعض المدونين؟
اخاف ليه000انا لابس استك منه فيه
لا طبعا بالعكس اللى خلانى ادخل عالم التدوين هى المدونات السياسيه 00اما اعتقال المدونين فلا صدمنى ولا حاجه 00شىء متوقع
س12:هل فكرت فى مصير مدونتك حال وفاتك؟
ليه الفال الوحش ده
مافكرتش بس يتهيألى ان فيه حداشر واحد غيرى هيكملوا..اه حاكم احنا عزوه والعدد فى الليمون ربنا يخليهوملى0
س13:تحب تسمع ايه؟
موسيقى الف ليله وليله بعود نصير شمه
عقبال ما عبد الرازق(اولد متكاظى)يفتكرنى ويجيبها
انتهت الاسئله مع اطيب التمنيات بالتوفيق

Sunday, September 03, 2006

حول الاسكندريه فى ستة أيام

ست ايام بعد عن المدونه كان كتير الواحد حس انه ساب عيل من عياله وطفش بس معلش بقى هى دى الاجازه السنويه للمتكاظين او للدقه بعض المتكاظين 0اللى كان منهم قاعدين فى شقه واحده زيى انا ومليجى وزوردياك والمتكاظى الغير مشارك فى البلوج لظروف سياسيه تتعلق باختلاف فى وجهات النظر عن جدوى وجود كائن السرفل القرمزى فى جحر انثى الارنب البرى لساعه متأخره من الليل :) العسل أسامه،ومنهم من كان مع العائله بس الحمد لله عرفنا نصطاده يوم _أولد متكاظى_واللى سلمنا عليها وكانت برضه مع العائله _مارو_دول كلهم كانوا فى الاسكندريه اما اللى صعبان عليه بجد هو مورو الذى يجاهد فى الصحراء الغربيه لظروف التدريب الصيفى لكلية البراجل_قصدى الهندسه_ربنا معاك يا عمووور0
أولا: اسكندريه مع العشق الدائم ليها الا انها قبيحه فى الصيف بسبب ذلك الزحام الرهيب وذلك الانتهاك الدائم لخصوصيتها، فبعد ما قررنا السفر فى أخر شهر أغسطس على اعتبار انها ستكون هادئه نسبيا تلك الفتره الا اننا اصيبنا بخيبة أمل بس قلنا هننبسط برضه ومما زاد من قبحها فتيات مصر الاعزاء الاتى افصحن عن كل شىء ردا على تشفير الشو تايم حتى لا يصاب شبابنا بالضيق والتوتر النفسى من جراء ذلك الكبت الثقافى0 ملخص النقطه دى أن اسكندريه أجمل مليون مره فى الشتاء0
ثانيا:عملناها و فاجئنا زوردياك بحفلة عيد ميلاده ،الميزه انه اتفاجىء زى السنه اللى فاتت حتى لو كان متوقع اننا هنعمله الا انه دايما كان بيتخض لما نخش عليه شايلين التورته ويتسائل_ظبطوها امتى؟ ده احنا طول اليوم مع بعض_معلش يا ابو حميد ده سر الخلطه :p
ثالثا: الحمد لله اثبتنا اننا فقر أول يوم وصلنا فيه اسكندريه المحافظ اتشال0
محبس حنفية الشقه باظ0
نجيب محفوظ مات 0موته ما كانش صدمه ،من أول ما دخل المستشفى والامر كان متوقع اما اللى كانت وفاته صادمه كان و محمد عبد الوهاب لاعب النادى الاهلى ،فضلت مده قدام التليفزيون مذهول وعلى لسانا كلنا جمله واحده _لاحول ولا قوة الا بالله_بجد كان يوم سىء جدا0
اليوم الوحيد اللى نزلنا فيه شارع خالد ابن الوليد شرطة المرافق كبست على الشارع والباعه السريحه لموا بضايعهم وهاتك يا جرى_مش بقول وشنا حلو_بس الحمد لله عدت على خير ومفيش حد اتاخدت بضاعته،بلد غريبه ما بتتشطرش الا على الغلابه0
بعض المشاهد
شاب و فتاه قاعدين على كوبرى ستانلى كل واحد منهم باصص على الارض وزعلانين قوى _اه نسيت اقولكم ان الولد ايده اليمين كانت مكسوره_هههه0
فى المنتزه ظابط الامن بيوصل العشاق لاماكن بعيده عن الناس بس انت ادفع0
محل الاقصر بتاع البيره فى خالد ابن الوليد كان بيبع لزبون و المحل اللى جانبه مشغل قرآن0
بنت لابسه بكينى و بتحلف بالمصحف0
طفل صغير بيبيع ترمس بنت بتديله فلوس ومش عايزه تشترى رفض انه ياخدها _واد جدع _ربنا يحميه0
سؤال سألته بنت اجنبيه لما شافت اتنين عرسان على ستانلى شاورتلى على العريس وقالتلى_هل ده ابوها؟؟؟
قولتلها _لا ده العريس0
اوعى تفتكروا ان العريس كان عجوز قوى بالعكس كان عنده حوالى 32 سنه يعنى السن الغالب للجواز بين الرجاله عندنا لكن كم الذهول اللى كان على وشها والتأسف على حال العروسه اللى لسه صغيره خلانى افكر من اول وجديد واتضايق على حال شبابنا وعلى سنة رسوله اللى ضاعت امام تعنت الاهالى والزام العريس انه يجيب النيش_تعرفوا ؟ هى المشكله كلها فى النيش_0
أخيرا:احلى مكان فى اسكندريه القعده عند الصخور بعد ستانلى بكام متر منك للبحر عدل وصوت فيروز بيغنى _حبيتك فى الصيف00حبيتك فى الشتى_بالذمه فى حد بيحب بالحلاوه دى0