Monday, December 29, 2008


نجيبك تاني ازاي!!
....
...
...
اللهم لا تؤاخذنا بما فعل السفهاء منا

Monday, November 10, 2008

الست فرحة
ربنا ما يكتب علينا الزعل تانى!!
جملة قالها ابويا فرحتنى آخر حاجة
بس وقفت بتاع ساعة مش فاهمة حاجة
ربنا ما يكتب علينا الزعل تانى!!
طب مش ندعى تنكتب علينا الفرحة اولانى
رديت عليا بس ميجيش الزعل والفرحة تيجى على مهلها
ولو مجتش نقوم كمان نندهلها
ننده بأعلى صوتنا ولو مرديتش نجيبها من شعرها
وده كلام؟هى الفرحة تبقى فرحة غير لما تيجى برجلها
ماهى مش خناقة ولا عافيى دى حاجة بتيجى لوحدها
تلاقيها تجرى على صاحب النصيب ترسمله ضحكة بنفسها
مش شرط غنى ولا فقير مفيش تفريق عندها
بس ساعة ما تيجى صاحب النصيب لازم قوام يخضعلها
رديت وقلت طب يا ست فرحة تعالي..وانا فى ثوانى هقوملها
اقطف من جناين الدنيا وردة واجرى عليها واقدملها
بس يا شيخة امانه عليكى قوليلها تدق بابنا وانا هفتحلها
ولو معجبنهاش تبقى تاخد بعضها وتجرى وانا برضه هفتحلها
ماهى تشكر برضه على مجيتها حتى لو ملحقناش نحسها
يعنى الست تكلف خاطرها واحنا نيجى نتنحلها
دانتو عيال رذلة قوى فاكرين وقتها ملكها
دى ياعبط الست فرحة هانم...قوم يلا وسعلها
امانة عليكى تقوليلها تيجى بيتنا وانا الباب هسيبلها
عشان متقولش هنحبسها او طمعانين فى ضحكها
تيجي وقت وا تيجي وتمشى وقت ما يروقلها
المهم تيجى مرة عشان احلف اقول والله مرة شفتها



Saturday, August 23, 2008

!!!!نفسي أعرفه


عبقري

والله العظيم عبقري

بجد نفسي اعرفه

المبدع

قال ويقولك "نستراداموس" أحسن متنبئ في العالم

بذمتكم ده كلام

ياما نفسي حد يدلني عليه

المبتكر

الجهبز

الفلته

!!!!اللي صمم علم مصر

نظره مستقبلية مبدعة...يعني زمان كان العلم بتاعنا مش كدا...

كان اخضر...والاخضر ده رمز للنماء والسلام والرخاء في كل الحضرات

وفي وسطه هلال..زوده لأن مصر كانت-للي مايعرفش- اسلاميه..والهلال هو شعار الاسلام

والعلم ده كان ايام الملكيه -واخدين بالكم الملكية - راح معاها

ومع بداية العصر الجمهوري كان لازم يتغير العلم

فاتحط العلم اللي محطوط فوق عندكم ده

قوم أنا من صغري كان نفسي افهم اشمعنا الالوان واشمعنا النسر

بس فهمت معناهم من فترة

والله الهام من ربنا

كنت راجع من القاهره ولقيت كشك ع الطريق صاحبه دهنه لون العلم

وساعتها لقيت الفكره منورة في دماغي

عرفت العبقري اللي صممه ده كان قصده ايه

شال الهلال وحط النسر...لأنه كان عارف ان مصر ماشية في سكه بعيده عن الاسلام والتدين ومتجهه للعلمانيه..فجاب رمز دنيوي يستمد قوته من طاقه حيوانيه همجيه..وياريتهم سابوه على حاله...دول قصقصوا ريشه ولموه"راجع بريزة زمان قوي...وبريزة زمان مش قوي"0

والالوان....ياسيدي ع الالوان

الاحمر...الفترة الاولى في الحكم الجمهوري"الرئيس الراحل جمال عبد الناصر وأول حكم الرئيس الراحل برضه السادات" ودي كانت فترة ثورة ...وتصحيح..وحرب ..ونكسة ...واستنزاف...وتأميم..ونصر ...واللون الاحمر هو المعبر عن روح الثورة

الابيض...لون السلام وده رمز السلام وبيمثل فعلا تاني فترة في حياة مصر ...بعد حرب اكتوبر والسلام والكلام اللي انتم عارفينه

الاسود...ودي قمة العبقرية...ختمها بلأسود...حد يقولي كان يعرف منين ان الايام اللي بعد كدا سودا

طب حد يدور عليه ويقوله ...في حاجه بعد كدا...ولا ده اخرها

يعني نستنا معاليه اللي ها يدينا كلنا لقب الراحل على ما يرحل وبعد كدا هاتنور...ولا خلاص كدا...ومعاليه هايناولها-لامؤخذة في الكلمه- للي ها يجيب درفها اكتر من كدا

بذمتكم مش الراجل ده يستاهل جايزة...واسمه يتحط في موسوعة جينيس

Tuesday, July 01, 2008

بيان هام...بياااان هااااااااااااام





سول فى محاولة بائسة للتخلص من الأرواح الشريرة التى سكنت جسده بسبب المذاكرة فى هذا الوقت من العام

من المؤكد أن أى روح شريرة ستفكر ألف مرة قبل أن تغزو جسد أى عضو من أعضاء البلوج

و إذا عرف السبب بطل العجب


البلوج مغلق لحين شفاء جميع أعضاءه من الإعاقة العقلية أو لحين الانتهاء من الامتحانات ... أيهما أقرب




وما خفى كان أعظم

نياهاهاهاهاهاهاهاهاهاههاهاهاهااهاه

Thursday, May 15, 2008

نشوة

منذ اللحظة الأولي التي دخلت فيها حياته و هو يقاومها و يقاوم سطوة تأثيرها عليه ، كانت تثيره بذكاء ، تلح عليه و قبل أن يبدأ في الشكوى أو حتى في الإحساس بأن الأمر اصبح مملا تختفي فجأة لتتركه يبحث عنها كثيرا حتى يبدأ زخمها في الابتعاد عنه شيئا فشيئا فإذا بها تظهر من جديد .
في البداية لم يبد اهتماما ، لم يكن مهتما فعلا ، لم يعرف بدقة متي احتوت علي تفكيره بهذا الشكل ، تسللت إلى وجدانه بخفة ، لم يعرف أهو شيء ما في حركتها أمامه أم أن شيئا غير مرئي في وجودها يجعله يفتقدها و يتذكرها في وحدته .
لم يعرف أيضا متي تحول كل هذا فجأة إلى كل هذا الضيق ، ألم تفكر أنها بدورانها حوله و إلحاحها ثم اختفائها ستصيبه بالجنون . بالتأكيد هي لا تعبأ إطلاقا بهذا ، كل ما يهمها هو أن تشاهده و هو يذرع الغرفة جيئة و ذهابا و يكلم نفسه بحثا عنها و هي تراقبه من نقطة بعيدة لا يراها، أيقن تماما أن هذا بالضبط هو ما تريده ، أن تجعله مجنونا، إنها تصل إلي قمة متعتها عندما يخلو بنفسه إلي اكثر شيء يعشقه في الوجود – البيانو – يغمض عينيه و يحرك أصابعه بخفة لتلمس أطراف أصابع البيانو ليبدأ اللحن الذي انتظر تدفقه طويلا في الانسياب و عندها فقط تأتي بصوتها المزعج و حركتها المستفزة لتقتل لحظته الخاصة.لا يعرف تحديدا متي قرر فعلا أن يقتلها ، في البداية كان خاطرا لم يكلف نفسه عناء التفكير فيه و لكنه و كما تتراكم الأشياء الصغيرة لتصبح جبلا لم يحس بنفسه إلا و تلك الشهوة تلح عليه ، تحتوي عقله كله فلا تدع له مجالا لأي فكرة أخرى ، و كما تبدو الأشياء البعيدة مبهمة ثم تتضح تفصيلاتها في القرب كان كل إنكار للفكرة بينه و بين نفسه ينتهي بإضافة صغيرة لخطته التي بدأت تتضح ، استعبدته الفكرة ، سرت في دمه رويدا حتى وجدها هي بكيانها كله أمامه و بكل براءة تقف وحدها سارحة متأملة ، سري الخدر في أطرافه و كست غمامة عينية فلم يعد يري أو يسمع غير وجودها أمامه ، لم يحس بخطواته المتسللة و هو يحضر سلاحه و لا بيده و هي ترفعه لتهوي به بقوة عليها ، حتى عينه لم تطرف لحظة الاصطدام ، نظر إليها في عينيها نظرة أخيرة ، حتى انه لم يحس بتيبس يده حول المقبض كالتمثال ، تجمد لفترة لا يعلم مدتها لكنه في النهاية استطاع أن يزفر زفرة طويلة و يزيح جثتها بطرف يدهه من أمامه و يقول " ذبابة حقيرة".

Saturday, May 03, 2008

كل 80 سنه وانت برج ثور يا ريس


ده مقال الصفحه الأولي في جريدة الأخبار لمنافق الرئيس حاليا رئيس تحرير أخبار اليوم سابقا ممتاز القط بعنوان ليه بنحبك يا ريس؟
الاجزاء المكتوبه بالأسمر هى مقال السيد الهر ومش هحلف طبعا ان الكلام ده مكتوب فعلا فى جريده عريقه زى اخبار اليوم ولا هحلف انى عمرى ما شفت نفاق للدرجه دي0
البوست مفتوح للتعليقات البريئه منها وغير البريئه0
شارك بإضافة لمسته الجميلة فى البوست اسامه ولو لاقدر الله اتمسكت فيبقى هو اللى كتب البوست كله وياروح ما بعدك روح0
_________________

(ياريس كل سنه وأنت طيب وربنا يخليك لينا)

كل سنه ومصر تعيش معك أغلى واعز أيامهاهههههههه ..سنوات مرت وكأنها حلم جميل فازوع كوبسه داعبنا, وجعلنا نبتسم لكل أيامنا0

في عيد ميلادك ياريس ندعو الله لك بالعمر المديدهو 80 مش كفاية برضه ولا إيه لكي تحقق لنا المزيد والمزيد..فنحن سيدي الرئيس قدرك وأنت قدرناعايز حد يعترض على القدر بقى إيه هتكفروا. لمن غيرك نشكوهنشكى لربنا يا محترم...خاف الله خاف من مين غيرك نطلب يا جمال إسلوبك لمن غيرك نروى أحلامنا و آمالنا في مستقبل نملك فيه القدرة على أن نحقق طموحاتنا فعلا الواحد مش عارف يحقق انهوا طموح فيهم يااااااه كتير كتير صراحةونترك لأولادنا وأحفادا وطنا عزيزا وقادرا على أن يحقق كل ما يتمناه0بصراحة ..إحنا بنحبك لانك إنسان أصيل ...بتعرف تحافظ على كرامة وكبرياء بلدك وشعبك فعلا ده حتى البنت اللى ماتت على الحدود مع إسرائيل قلب الدنيا عشانها ولا البمبوطي اللي أتقتل في قناة السويس اتحمق وانتفخت أوداجه عشانه بتعرف تقرأ المستقبل صح ياريس والكف والطالع والفنجان وبيفتح المندل كمان لو حد ضاعت منه حاجه وفى كل حاجه بره وجوه زى الاهلى بالظبط0

بنحبك أتكلم عن نفسك يا كابتن لانك ما بتعملش حاجه إلا بعد ما تحسبها صح ويكون قرارك في الصميم...بنحبك لان تاريخك كله نظيف ابيض فعلا عشان مفيش تاريخ أصلا0
دايما ياريس القرار الغلط في أي مجال يكون له تأثيرات سلبيه بتختلف من مكان لمكان ولكن في الطيران القرار الغلط يعني الموت بخ ومن هنا بيكون فيه تقدير وحسابات كاملة لأي قرار0
طول ما إحنا معاك ياريس حسينا بالحكاية دى أنا حاسس فعلا بس بحاجات تانيه مفيش انفعال ولا غضب ..أى حاجه دايما تسبقها دراسة كاملة..كتير قوى ياريس مواقف مرت علينا ولا بلدنا..تحديات كتيره لا لها أول من آخر..لكنك ياريس عدتها بسلاموريحت دماغك بحنكه ومهارة وتفكيرقول يا ستامونى قول كانت دايما ياريس مصر معاك للأسف فى قلبك و عقلك والعدو والحبيب دايما بيحسب لبلدنا معاك الف حساب يا سبع0

بنحبك ياريس لان سمعة مصر أصبحت معاك زى البرلنت لا وانت الصادق دى بقت زى سمعة سونه على ما تفرج فى كباريه النجوم وبيحسدونا عليك خدووووووووه لانك مننا دايما ياريس كنت معانا0

ساعا ت كتير كنا بنكلم نفسنا بنقول يا ترى الريس حاسس بينا هذا هو الموجز واليكم التفاصيل يا ترى الريس حاسس بمشاكلنا وهمومنا تيرارارارااااااااا وفى كل مره ياريس نكتشف الحقيقه دن دن تش إنك معاناهيييييييه أنك جزء مننا وإحنا جزء منك انهو جزء وأنا أتاويه ..بتتكلم زينا ايه ده ..بيدعى على نفسه؟ وحاسس بالظروف الصعبه اللى إحنا بنعيشهاحتى الريس بيطلع عينه فى طابور العيش لا اله الا الله هما مش فصلو الانتاج عن التوزيع فى مصر الجديده ولا ايه؟0
بصراحه ياريس ..إحنا نسينا أيام زمان ..أحنا ادلعنا فى عهدك ياريس- ادلعنا والله انت راجل مسخره- ونسينا زمن الاشتراكيه – فقرا ايه بقى خلينا نغتنى ونحتكر-اللى ضحكوا بيه علينا لاننا اكتشفنا إننا بنعيش فى وهم جميل صحينا منه يوم 5 يونيه.

نسينا زمن تليفون العمده وبقينا دلوقتى محتارين نركب 012 ولا 010 ولا 011 ولا أرضى يا لفظاعة الانجازات ههههههه نسيت مفتاح الزيرو ليه بس يا راجل..الاقيش عندك كارت بعشره نسينا القطارات ماركة اللى يحب النبى يزق دلوقتى بقى فيه قطارات ماركة اللى يحب النبى يولع نسيت قطر الصعيد ولا ايه نسينا زمن كل حاجه بالبطاقه من قطن العرايس لحد قماش التيل والبفته والدبلان دلوقتى مش هتجيب حاجه لا ببطاقه ولا بغيرها نسينا زمن المجارى اللى طافحة وطلمبات الميه البحارى ووضع النوايه جوه الزيرهو كمان شرب الميه الملوثه وتصريف البي بى بقى شىء خارق نسينا اللهو الخفى دلوقتى اللهو على عينك يا تاجر والناس بتعتقل فى وضح النهارنسينا نشوف النجوم فى عز الظهر0

دلوقتى كله بيتكلم مفيش حد خايف شلت الخوف من قلوبنا ياريس انا لسه واحد معدى عليه اول امبارح شايله منى يا جدعان كلمة حق برضه ودى نعمه مكناش حاسين بيها دلوقتى ممكن أى واحد ينتقد رئيس الجمهوريه والحكومه وكل حاجه ساعات بنزودها حبتين لكن جوانا شعور اننا مش خايفين عارفين ان فيه كبير فى البلد بيحبنا وبنحبه عايش فى قلوبنا وقريب منا دايما عندك حق يا شيخ ده لا فيه انسه اسمها اسراء اعتقلت ولا بتوع كفايه بيتضربوا ولا بيتسجنوا ولا ايمن نور بتتلفقلوا قضيه ولا الاخوان بيتحكم عليهم عسكريا ولا ابراهيم عيسى اتحكم عليه ولا اى حاجه خالص خالص 0
بنحبك ياريس لأنك مننا انت الرئيس الذى لايتحدث لغتين اللى بتقله فى الغرف المغلقه هو اللى بتقوله فى العلن ودايما افكارك سباقه والعالم كله يا ريس قد ايه بيحترمك ويقدر زامبيا زيمبابوى وموزمبيق وزنزيبار على رأى واحد أعرفه طولة بالك وسعة صدرك ياريس وحبك لينا يا نهار كحلى هو اللى بيحصل فينا ده كله وهو بيحبنا امال لو كان بيكرهنا كان ايه اللى حصل......محدش يستفزه يا جدعان ده مقطع بطاقته خلانا نطمع اكتر واكتر ياريس؟

فى عيد ميلادك الناس ..اهلك ..وشعبك ..كل اللى بيحبوك المفروض يقدمولك ورود الدنيا كلها فى حالة انى ما أضربتش هجيبلك حزمة جرجيرياريس كنت سباق بالخير محدش جابله ورد ولا ايه طول عمرك سباق بالخير صادق والله العلاوه ياريس كانت مفاجاه كانت عبور بالموظفين الغلابه من الدوامه اللى عايشينها ليل نهار ايه ده هما ال45 جنيه بتعمل كل ده.؟؟؟ عبور ودوامات وعبارات ولا بلاش السيره دى0


الناس كلها ياريس بتقولك فى عيد ميلادك كتر خيرك وربنا يديك الصحه والسنه الجايه لاهو فى سنه جايه برضه هنقولك علاوه ياريس ..ريس له فى قلب كل مصرى حب ما يتقدرش باموال الدنيا كلها اهىء اهىء اهىء سنييييييف كل سنه ومصر معاك بخير ياريس ونفضل دايما نقولك عايزين وعايزين ده على اساس انه بيدينا من جيبه هو فى ايه؟ والسنه الجايه مش مهم العلاوه تبقى 30% خليها 25%بس اه عشان ما نتعودش على العز إحنا مش طماعين!! كل سنه وانت بكل خير ياريس0

Friday, May 02, 2008

!!!!!!!!!!





بدأ وصول الغاز المصري لإسرائيل
شالوم يا ريس
___________________
أشعر بالعار

Tuesday, April 15, 2008

خسر الجميع وانتصرت مصر



اصابنى الاحباط منذ فتره طويله كان الاحساس السائد انه لا أمل فى تغيير ما أصابنا من قهر وظلم على يد مصاصين دماء أستخرجوا بطاقات سجل فيها أسم مصرى فى خانة الجنسيه على يد من يحمل المصحف كهديه من الازهر فى احتفالات المولد النبوى من يقارن بين مصر و دول العالم الديموقراطى فى ارتفاع اسعار الغذاء فقط.... فى السىء فقط.. لم يعقدوا مقارنه ابدا فى الطيب فحريتهم فاسده وحقوق انسانهم ان صح التعبير مؤامره على هويتنا وعلى حقوق جمال وعز وبقية اللزجين من اصحاب الياقات والبدل الايطاليه ولهم فى ذلك كل الحق فلا يعقل أن يعمل ابن رئيس جمهوريه فى غير رئاسة جمهوريه الجميع يتمنى لأولاده أن يكونوا افضل منه تلك هى سنة الحياه

لمن لا يدرى لا توجد ملائكه على الارض لكن فى مصر اصبح هناك من هم اكثر شرا من أبليس0
عندما جاءت الدعوه لإضراب 6 أبريل لم أكن متفائلا حدثتنى نفسى ان من سيستجيب للإضراب هم طلبة الجامعات والمدارس و عمال المحله بحكم انهم أصحاب شرارة الفكره أستمر هذا الشعور بداخلى حتى يوم 5 عندما ضحكت من أعماق قلبى وأنا اتابع شريط الأخبار عن كلام المصدر الأمنى الذى اتمنى أن تسعدنى أيامى معرفة من هو يحذر ويحذر وينكل و يتوعد بقطع لسان من يضرب من لغلوغه و يؤكد أن المصالح والمدارس والجامعات سوف تعمل بالطبع ستعمل بنظام السيد بوش أنت معانا ولا مع الناس التانيين- لو أبوك مات تعالى بيه وأدفنه فى الشغل والا تبقى عميل ومحرض وبتعطل مصالح الناس اللى مش متعطله خلقه-طرق التنكيل الادراى لا تنتهى من لجان تحقيق الى ترصد للأخطاء والموظف هو أتعس خلق الارض لن يجدى معه قرار فردى منه بالاضراب....أكثر المصريين ايجابيين لكنهم يحتاجون مظله قويه رمز يتجمعون حوله حتى لو لم يكن قادرا على منع بطش الطغاه0

عندما قرأت شريط الاخبار تأكدت من حدوث استجابه لأن التقارير الامنيه التى حذرت من استجابة الناس للدعوه هى التى حركت آلات الاعلام الموجه لفرد واحد ولحزب واحد ذلك الاعلام الاعمى الغبى الذى لم يقتنع حتى الان ان الهدف الوحيد من مشاهدته هو التمتع برؤية أشخاص يكذبون بفحش وفجر...تأكدت من الاستجابه لان تقارير امن الدوله أصدق من اى احساس0

لم تشارك الاحزاب فى الاضراب........طز
هل انتم احزاب بالفعل؟
لا
يبقى طزين

لم يشارك الاخوان فى الاضراب



أتمنى ان تأتى فرصه اتعاطف فيها مع الاخوان المسلمين لكن للأسف لديهم قدره غريبه على القضاء على مثل ذلك الشعور يأتى الاخ عصام العريان على ال بى بى سى ليقول انهم تركوا لكل عضو حرية الاشتراك او عدم الاشتراك فى الاضراب (من أمتى يعني؟) ثم يأتى عضو آخر يصرح انهم لن يشاركوا فى الاضراب وينعته بالفوضى قبل حدوثه بيوم فى البدايه التبس على الامر من يتحدث صفوت الشريف أم أحمد عز بالفعل شىء يدعو الى الغثيان هل هى هدنه من أجل المحكمات العسكريه التى نرفضها أم ماذا؟



يتحدث العريان عن منعهم من الترشيح فى المحليات يوم الاضراب لماذا خلط الأوراق أنت تتحدث عن الأضراب أين مصلحة الشعب أم مصلحة الأخوان فوق مصلحة الشعب أيهما أهم المحليات أم معاناة الشعب؟



ثم لماذا نشاهدكم فى مظاهرات التعاطف مع جوعى غزه ولم نشاهدكم فى مظاهرات رغيف العيش وجوعى مصر ومضطهدى المحله ؟



شىء يدعو الى الاستياء



لقد خسر الاخوان وخسرت الاحزاب وخسر خدم البلاط وانتصرت مصر لنفسها انتصر الشباب ..انتصرت كفايه والفيسبوك وإسراء عبد الفتاح ...انتصر جورج اسحق وسقط رفعت السعيد ومحمود اباظه ومهدى عاكف وصفوت الشريف لقد اصبحتم جميعكم فى كفة الحزب الوطنى والشعب فى كفه اخرى لن نراهن بعد الان على احزاب ورقيه ولا على جماعات تهتم بانفسها



فقط سنراهن على انفسنا وعلى شعب مصر



نجح الاضراب ولم تفلح معه بلطجية المحله الذين اشعلوا الحرائق و لا تشبه الامن بالبلطجى الذى يبطح نفسه ليتهم احد الشرفاء



سقطت صحف الحكومه التى سارعت اليوم الذى يلى الاضراب بمانشتات تقول ان الشعب لم يستجيب الا دعوات القله المنحرفه وان الاضراب فشل -مع العلم انه لم يتم ذك كلمة اضراب فى الايام السابقه له تم الذكر فقط فى اليوم الذى يليه-ثم يا أيها الكاتب اللوذعى منك له هل خروج مدينة المحله الكبرى كلها فى مظاهرات واضراب قله؟



هل خواء الشوارع فى مدن مصر والجامعات قله؟



اذا كان كل هؤلاء قله منحرفه فأنا أعلن انحرافى وسعيد به...ما أجمل أن نكون شعب منحرف بهذه الطريقه وتركنا لكم الاستقامه يا انظف خلق الله0

Wednesday, April 09, 2008

An Takoon Metkazian

Ana Kont me7tar Akteb awel 7aga eah fe el blog Dah??

Akteb eah mesh 3aref?

o2lt Ashkor seadet el rayes we el wozara2 el afadel 3ala el invitation el gamda deh, bas o2lt fokakk menhom, ana mesabethom abl keda keteer mesh 7abaket el marady kaman, we kaman kefaia eny bakteb franko arab 3ashan el ta3lemat keda, la tasta7`dem al logha el englezia :((

Akteb Eah??

Ahh

Hakteb 3an el metkazia - 7aga gededa mott sa7 - , ma la ya3reho el ba3d any kont fe qa3det ta2ses hazeh el 7araka el mageda, kont asghar 3odow mo2ases bas ma3alina malnash da3wa beltafasel deh.

Kefaia mo2ademat b2a.

An Takoon Metkazian:

1- An takoon a3eed m3a el ragel ely hayedeh el gawda lel kolia beta3tak we yes2alak eah yabny 7adart kam egtema3 magles kolia, fa tefta3 Fahak (bo2 sa3atak) we te2ol n3am ya fandem, magles koliet eah?? Fa 2ant men el momken an takoon Metkazy.

2- An Takoon a3eed m3a nafs el ragel beta3 el gawda we yes2alak eah yabny, etnasharlak kam ba7s fe magalat 3elmia m3a 7ad men asatzetak, Fa ye7sal nafs raded el fe3l ma e7`telaf baseet enak mesh 3aref eah heia el magla el 3elmia deh aslan, akeed 7aga keda zay Super Mikey, aw Flash,, Fa 2ant sa3etha bardo momken tekon-bas lesa shewia bardo -howa el 7aia bel sahel- Metkazy.

3- An Takoon a3ed m3a el set beta3et el gawda - 3ashan ma7desh ye2ol eny bakarar el kalam -we tes2alak, ha enta akter qesm 3agabak eah, to2alha mesh 3aref aslan 3ashan ana mesh ba7dar mo7adratat wala roundat --- Waqe3a 7aqeqia : ba3d ma da7`t sana 7`amsa wa7ed sa7by fe rab3a sa2alny howa qesm el ENT feen, shawertelo 3ala el moustashfa el gera7a we 2oltelo el door el talet, wa7ed sa7by kan wa2ef ma3ia le72o we 2alo yabny el ENT Aslan mesh fe mostashfa el gera7a, el ENT Fe el Mostashafa el tnia we kaman fe el door el rabe3, Ana 2agelt emta7an el ENT beta3 el Round 3 marat, we Emta7an a7`er el sana kamn fa nazariean ana darst ENT lemodet 12 Shar, 2al aktar qesm 3agabny al --- 3ashan ana mesh bastafeed we bat3ab menha, fa 2ant 3ala el tareq al sa7e7 le kay takoon Metkazy.

4- An takoon a3ed m3a el group beto3 el gawda 3ala enak hat2adem presentation 3an el nashat el toulaby fe el kolia, we tale3 3enak feeh b2alak 2 days, wa tofage2 en el a3da aslan 3an el ab7as el toulabia mesh el nashat el tolaby, we matkolsh m3ak bardo we tedos fe el kalam we keda keda 3ayez te3red om el presentation, fa 2ant keda qareeb men an takoon Metkazy.

5-An Takoon a3ed m3a el lagna el gaia teqayem el kolia el enta betedres feha b2alak ma yaqrob keda men 5 seene - :'( - we yes2alok law enta betqaem koleyetak hatedha kam men 10 fe el ab7as el toulabia to2om sa3atak 2ayem we 2ayel 10 ta7t el sefr, fa 2ant Men al Qela alzeen eqtarbo men el ma3na el sa7e7 le kelmet Metkazy.

law 3amalt el kalam dah kolo wenta taleb fe el kolia deh Fa2ant Men alzeen ya7tawoon 3ala ba3d sefat el Metkazeen el oustouria, bas law 3amalt kol dah we 2enta el mafrood enak men el tolab el active fe el kolia, we kol youm a3ed fe el kolia, we 3altool tale3 nazel men 3an el 2edara, we leek nashatat, we enak te2ol kol el kalam dah wenta tekoon mesh bethazar wala betekdeb fe ay kelma menoh, aw tekon betale3`, we enak tez3al ba3d keda en el kolia beta3tak se2tet fe el e3temad el MA7AlY mesh el dawly 7ata, ya3ny bel 3arab mesh mo3taraf beek da7`el el nezam el masry lel ta7leem - dah eza kan fe 7aga esmaha keda alsan -, we 2enak tekon za3lan en kol el kalam dah bey7sal men 7awalek we el nas sakta we mesh farqa m3aha, we 2enak tekoon zeh2et men el nas el salbia el mesh far2a m3aha, kol youm betebahdel akter men el youm el 2ableeh wala ka2n fe ay 7aga bet7sel - 2al we keda mesh kefia, 2al eah kaman beydaf3o - , an takoon mesta3`rab en kol el masayeb el 7awalek deh bet7sel fe KOLYETAK - O2la 7`amass senen sa7, we lesa 2 tanieen - we fe nafs el wa2t yekoon ham el tolab en e7na el mafrood neqate3 el montagat el holandia, we, we, we, we,.

Momken Sa3etha bas, Tekoon Fe3lan Metkazy.

Wala ento eah ra2yeko??

Saturday, April 05, 2008

المدونة مشاركة فى اضراب 6 ابريل


Thursday, March 20, 2008

كيس شيبسى

التوقيت : الفترة التى تسبق امتحانات السنة الخامسة من تلك الكلية اللعينة (الله لا يعيدها أيام).0

يوم آخر ينتهى .... يوم من نوعية (والحسابة بتحسب) ، تلك الأيام التى تنقضى الواحدة تلو الأخرى لتفاجأ بنفسك - وأنت لم تعرف ماهية السنة أو مضمونها - فى مواجهة الإمتحانات.0
إعتدنا ان نجتمع أنا و أصدقائى فى بيتنا لمؤازرة بعضنا البعض و الشد من عضد بعضنا لكى لا نسقط فى براثن التنميل فى الفص الأمامى للقشرة المخية ؛ و هو وباء ينتشر فترة الامتحانات ، تبدأ أعراضه بهيستيريا شم صوابع القدمين لتنتهى بفتحة فى أعلى الجمجمة من أجل التهوية و عمل أعلى دماغ على حد قول الضحايا (قليلون هم من كان لهم شرف الوصول الى تلك المرحلة).0
أنهينا المذاكرة أنا و اثنين من أصدقائى ...و كالعادة هوس حسابات التلت اصفار (نتيجة آخر السنة) نحسب مجموع درجاتنا المتوقع ان يتبقى بعد طرح ماسيتم بعترته منها فى الشفوى و العملى و النظرى و أعمال السنة ... نمعن النظر كثيرا فى الناتج ... ثم فى النهاية نحسم امرنا باختيار الأعمال الحرة ... ففكرة اعادة السنة أو تجربة الحظ فى كلية أخرى لم تكن تستهوينا على الإطلاق.0
ذهب احدهما و بقيت أنا و صديقى الآخر ... ذهبنا و اشترينا كيسي شيبسى من الحجم العائلى و جلسنا قبالة الجامع المواجه لمنزلى - حيث توجد (فسحة) كبيره - نستمتع بأكلهم و لك ان تتخيل ان الشيبسى كان يعتبر قمة الرفاهية بالنسبة الينا فى مثل هذا التوقيت.0
جلسنا نحاول استجماع شتات النفس و استرداد آدميتها بأن نتذكر أن لكل منا مشاعر و أحاسيس و طموحات و أحلام ، الكثير الذى كنا نرجوه فى تلك المرحلة من الحياة و الذى لم يتحقق منه سوى القليل ... حوار كنا نخوض فيه دائما حتى ننفس كبتنا لكى لا ننفجر.0
كنت فى غمرة انفعالاتى أتحدث حين هب صديقى من جانبى فجأة وتوجه فى هدوء الى الجامع .... لم أفهم فى البداية سبب حركته المفاجأة تلك .... فلم أكن أظن اننى ممل الى هذا الحد او اننى كنت ثرثار الى الدرجه التى تجعله يتحصن بالمسجد منى ... تابعته ... وصل الى الجامع، نزل على قدميه الى شئ متشح بالسواد لم يكن واضحا الى ان تحرك ... طفل صغير فى الحادية أو الثانية عشر من عمره مختفى فى بطانية سوداء .... تحدث معه قليلا .... ثم قام .... ناداه الطفل مرة أخرى .... فتوجه اليه تبادل معه كلمات ثم أعطاه كيس الشيبسى.0
عاد بجانبى و عيناه تنظر للفراغ ثم هم ان يكمل ما كنا نقوله ... قاطعته :
0
مين ... فين ... ازاى ... ليه.؟؟
مفيش لمحته هناك و الجو تلج قلت تلاقيه يا عين أمه جعان .... خدت و اديت معاه سالته اسمه و عايش منين ، و بعدين قلتله ياخد الشيبسى لأنى فعلا مش عايزه و مش هقدر أكمله ... مرضيش و لقيته كشر و قاللى انه مش عايزه و ان انا ليه قلتله كده و انى ضايقته أوى ....0
حقه
مكنش قصدى والله ... المهم اعتذرتله و خدت بعضى و كنت ماشى وانا قفايا يقمر عيش ، كان هاين عليا أولع فى نفسى بجاز ... نادانى "يعنى انت مش عايزه" ... قلتله لأ والله ... قاللى " طب هاته ... بس من فضلك متعملش كده تانى" ..... كنت هكره نفسى موووت لو مكنش خده.0
لم يطول حديثنا بعدها ، و انتهى اليوم عند ذلك الحد ... لا أذكر أنه قد فتح الموضوع مرة أخرى ، بل لا أعتقد أنه يتذكره الآن .0
كنت أتعجب من موقف الرسول (صلى الله عليه مسلم) حين بشر بأنه سبعون ألفا من أمته يدخلون الجنة بلا حساب فقام له أحد الصحابه وسأله ان يدع له أن يكون منهم ... فقال له : انت منهم ... فقام آخر و قال له ادع لى أنا أيضا يا رسول الله ... فقال : سبقك بها اخيك (نص الحديث لا أذكره و هذا فيما معناه)
كان يحيرنى لماذالم يدع له الرسول فى حين أنه دعا للصحابى الآخر ؟؟
فإن كان الجواب بأن يقفل هذا الباب كيلا يسأله آخر .... فلماذا دعا للصحابى الأول - بمجرد طلبه - من الأساس!؟؟؟
جائتنى الإجابة فى تلك الليلة حين قست بينى و بين صديقى ... كلانا كان فى نفس المكان ، كلانا تشغله نفس الهموم ، كلانا يرتدى المدعوقه النظارات .... ولكن فى حين ان منظورى لم يستوعب وجود ذلك الطفل و لم أره أساسا كان هو قد رآه و فكر و تحرك .0
لا أعلم لماذا اتحدث عن هذا الموقف بعد تلك الفترة الطويلة ... و لكنه ألح على كثيرا فى هذه الأيام الموحشة ، و ذكرنى بحديث
الحبيب (صلى الله عليه و سلم) (الخير فى و فى أمتى الى يوم القيامة).
0
و السلام ختام

Saturday, March 15, 2008

رسم بالرمال



video

وانا اللى كان منتهى أملى انى أرسم دايرة جواها نقطتين تمثل العينين و نقطة للمناخير و خط للبق ... و هييييييييه رسمت وش

اكتشفت انى معاق معاق يعنى

Sunday, February 24, 2008

!!!!!! وهل نتسول حقوقنا





Tuesday, February 19, 2008

كفاية حرام



فيدل اليخاندرو كاسترو يتنحي عن الحكم بعدما امضي 49 سنه رئيسا لكوبا




الي كل متشائم ينخر فى تفاؤل الشعب

الي كل موتور ظن انه سيعيش ويموت فى عهده المبارك

هاهي قد أتت العلامه الإلهيه والحكمه المبينه

يا كل متعجل

يا كل من فقد نعمة الصبر

اليكم فى صبر الشعب الكوبي عبرة يا أوغاد

هانت...... ماشيين فى ال27 وباقى 22 سنة...سهلها يارب

Monday, February 11, 2008



ان نفرح نرقص ننفجر ضحكا و صخبا ، ان ننطلق الي الطرقات تهليلا و غناءا،

عن الفرحة و الفوز و الثقة في اسم الوطن و الانتماء اتحدث،عن يوم فوز مصر بنهائي كأس افريقيا للمرة الثانية علي التوالي مع الثعلب العجوز حسن شحاتة.

لن اصف مظاهر الفرح لأن جولة بسيطة او حتي وقفة سريعة في شرفة اي منزل تكفي لأن تعرف ، لكني لم اتخيل كم ان هذا البلد و اهله كانوا عطشي للفرح بهذه الصورة ، و كم ان الاشياء البسيطة تكفي لصنع السعادة الا بعد هذا الموقف الذي سأحكيه:

أ/ سيد مدرس لغة فرنسية و رجل بشوش جدا و بسيط


مصطفي ابنه عنده 15 سنة و مصاب بورم خبيث جدا في عظام ساقه و يحتاج الي بتر فوق الركبة (شفت الكآبة اللي نزلت فجأة دي ، لازم ، مش انا اللي بحكي)


الولد سيتم حجزه غدا(تاني يوم الماتش) كي يجري العملية و رقمي مع والده كي يبلغني باتمام اوراقه حتي احضر لحجزه


اليوم و بعد صفارة الحكم مباشرة الهتف يدق ، ارد ، ياتيني صوته فرحا مبتسما مهللا و يقول "اتصلت لاقول لك مبروك " فقط و بسعادة حقيقية تماما

لقد كان هذا النصر سببا في لحظة من عصير الفرح لهذا الرجل المطحون


لهذا فرحت

و احببت هذا النصر

Tuesday, January 29, 2008

حتة شوكلاته



تاخدى حتة شوكولاته؟-
لا أنا عايزه الشوكلاتيه كلها-
خايف عليكي من السكر-
هاخدها كلها-

لم ألحظ كم هي جميلة حتى تعثر الساعي وتطايرت الاوراق واشتد بريق الضياء على عيناي

هاتى حبة نسكافيه-
لا مش هتاخد-
أنتي طماعة على فكره-
كوبايتك أهى-
لا بقى هشرب من كوبايتك-


لم أعرف كم هي رقيقه حتى جرحها النسيم و غردت لها البلابل كما لم تغرد من قبل

كل سنه وأنتي طيبه-
ورده واحده بس ؟-
أه واحده بس ومفيش غيرها-
لا في غيرها كتير مغطى سريرك-
بحبك-

لم أعرف كم هي ساحره حتى أخذتني للسماء وأجلستني فوق السحاب وداعبتني بالنجوم

هتسيبيني؟-
هستناك-

لم أعرف كيف كنت أحبك حتى جلست على سريري المغطى بالورود أستشعر الدفء في كوب النسكافيه منتظر أن آتى إليك بحتة شوكلاته........ حته صغيره .....عشان السكر
.

Monday, January 21, 2008

تاجن ستى

أنا مودى تحتتتتتتتتتتتتت .... ومش فى موود أكتب أى حاجة خالص ... و مبقتش بعمل حاجه على البلوج ده غير التاجات

قال يعنى كان بيكتب حاجة غير كده أو بمعنى أصح كتب حاجة عليها القيمة"0"

احم .... مرسى ... طب حتى أى مجاملة ... ده أنا بادئها شحاتة و مودى تحت و كلام كده يعنى

المهم مش موضوعنا ... التاج ده كان متأخر عليا من فترة طويلة
ومن غير لك التاج اهوه


لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟ اشمعنى العصر ده؟؟

أقتبس من عمنا يوسف معاطى اختياره الموفق "عصر الدولة العباسية" ....حيث الدنانير بالعبيط ... و الجوارى متبعترين فى كل حتة .... و المداحين بينافقونى فى الرايحة و الجاية ....و أبقى سلطان زمانى
عقدة نقص من الآخر يعنى


اول اولويه فى حياتك...عيلتك ...شغلك و لا اصحابك؟؟؟

امممممممم .... هى القاعدة انى أعامل الناس كلها فى الله .... بما فيهم نفسى
مين قبل مين سؤال برئ شويتين .... الأمور معقده عن كده افتكر


ايه اكتر حاجه بتحبها فى رمضان؟؟؟؟
.... روحانياته
الدنيا بتلهي أوى .... بس رمضان - سبحان الله – نفسى بتبقى مقبله على العبادة أوى .. ببقى حاسس انى قريب ... ربنا
يكتر من الأيام دى

اوصف ليا اجمل فطار ممكن تفطره؟؟
لما أكون فى وسط عيلتنا .... ولا يمنع انى أكون طفس و أقول لما يكون الأكل كمان جامد


لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
السؤال عامل بالظبط زى لما تيجى لواحد و تقولله : تفتكر لو وقع قدامك مليون جنيه هتدور على صاحبه و ترجعهوله واللا لأ؟؟؟
ولو جدع قول لأ ...

طب لأ
:p

بأمانة...هحاول
أصل حَكَم على مجموعة من الأفراد غصب عنى هيكون ليا تحيز ... بس ربنا يعين الواحد لو اتحط فى موقف زى ده ... غضب ربنا بيبقى شديد على اللى بيجور على عباده
أتأكد إزاى ....
فى الغالب هتبقى على طريقة محمد صبحى [ هل أنت من المؤيدين لى و لحكمى تأييدا مطلقا :) ... أم أنك - لا قدر الله - من المعارضين :( ] .... أهه مفيش ديموقراطية كده فى الدنيا
الأسئلة الممنطقة دى بتلبشنى ( و مش عارف يعنى ايه بتلبشنى؟!! ) ... هعمل تصويت من الحين للآخر و أى حد له تعليقات أو حاجة مش عاجباه يقولها - و أنا هاطلع .... أهله - قصدى وهناقشها معاه يعني
يووووه .... كفاية كدة على السؤال ده لحسن عقدى ابتدت تظهر


اللى بيبوظ الحكام ...نفسهم و لا الشعب و لا الحاشيه المقربه؟؟؟
اللى بيبوظ الحكام ...
اممممم ... عيوب تصنيع - سوء تخزين و تعبئة و استهلاك -أو بيبقوا جايين منتهين الصلاحية جاهز " و ده الغالب "0
وبعدين منين يبوظ و منين حاشية.. مهو يا كله عامّي يا كله كلام كبير .... معقد و صفصطائى ؛ امممم أظن كده
الشعب مش بيبوظ حد ... ممكن نفسهم و ممكن الحاشية المقربة ... لكن الشعب
ده احنا غلابه يا بيه


مين اكتر اعلامى مصرى بتحترمه؟؟؟

حمدى قنديل ..... برنامج رئيس التحرير و امتداده قلم رصاص على دبى ... بجد الراجل ده خرافة ... مش طبيعى
ونقول كمان أحمد المسلمانى (الطبعة الأولى) و منى الشاذلى (العاشرة مساء)0


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟
لأ لسه .... بس ان كان بهذه الأهمية أدعبس عليه و أقراه


لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
حاجة تيجى على قد العبد لله و امكانياته و طموحاته

مش عارف ... حاجة تريح بالى ... مقعدش أجرى طول عمرى و محققش اللى نفسى فيه ليا و لولادى

المهم النفس تبقى راضية

يعني........0

رئيس جمهورية شغال ... و الله راضى مش هقول حاجة

مش قنوع بالذمة

خفيف ... عارف


تانى بلد تتمنى تعيش فيه بعد مصر ايه؟؟؟

معرفش ... بالنسبة لى و لخيالى المحدود - انى أعيش فى بلد غير البلد اللى فيها كل ذكرياتى- مش هتفرق معايا
بجد مش هتفرق ... انا كائن متقوقع بيتوتى،خيالى بيقف عند آخر بلدنا ... ده ان مكنش عند باب الشقة

اوصف ليا ترتيبات اجمل فرح ممكن تحضره
مبعرفش أوصف أو ألك كتير.... المهم عندى البساطة و اللمة و الروح الحلوة ... مش أكتر


بتراعى كلام الناس و القيل و القال؟؟؟ لو اه او لو لا قلى ليه؟؟؟
هق هق هق ... قال كلام الناس و القيل و القال قال ..
ده كان زمان ... دلوقتى بقيت كما يقال ...
هوبّا
آه ... أيوه ... هوبّا ..... بقى ليا شطحات ؛ الله لا يوريكوا
ليه ؛ عشان مليت من محاولة انى ارضى الناس ... أنا على ما أنا عليه و اللى عاجبه كده أهلا و سهلا و اللى مش عاجبه يولع بجااااااااااااااااااز


لو مالقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟

جدا .... العصر اللى احنا فيه بقى صاخب جدا
بس هو اللى هفتقده بجد ماكنة الحلاقة الاليكتريك - اللى أنا مجربتهاش أساسا - بس ياللا هى دى ضريبة الروقان

السعاده هى.....؟

الرضااااااااااااااااااااااااااااااااااا ... اولا و أخيرا


و ميمنعش شوية حشيش يعنى ... نياهاهاهاهاها


....بهرج طبعا

....أكيد بهرج

أفتكر كده
؟؟؟!!!!!


عندك امل؟؟؟ اسبابك؟؟؟

لا تعليق


لما بتحب تهرب من كل شىء بتروح فين؟؟؟؟

بما انى مش من السهل انى انط على اسكندرية فى كل مرة أكون عايز افضفض ... بهرب لأوضتى لوحدى...إما أصلى ركعتين و أقعد أدعى لحد ماربك يفرجها ... أو بشغل موسيقى هادية واضلم الاوضة و اديها اكتئاب


امتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟

أول مرة جالى فيها شحط طولى تقريبا و الشنب خاطط فى وشه شبرين .... هلف ما شاء الله يسد عين الشمس .... حاجه عظمة يعنى
.. جابنى من فوق لتحت و بعدين


" عمو ... لو سمحت الساعة مع حضرتك كام ؟؟"

؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!!!!!

مش فاكر ساعتها أنا خدت نفس واللا نفسى اللى انقطع


لما بتعمل عمل خيرى بيكون ايه هو دافعك الاول؟؟؟

أكيد الوازع اللى جوا أي حد فينا انه مقصرو انه يقدر يدى أكتر من كده
أفتكر ده اللى مقصود من السؤال


بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟

للأسف ..... للأسف
لأ


بتعرف ايدك اليمين من الشمال ازاى؟؟؟؟
عن طريق تتبع آثار منخور العنكبوت على أشجار الأسمنت بجوار ينابيع الطحين

ايه الأسئلة دى .... مهى مش فيزيا يعنى
.... ايديا اليمين أهيه


.... وآآآآآآ


... و ايديا الشمال

.... آآآآآ

اهيه...

برضه؟؟!!!0

واضحه يعنى

عاااااااااااااااااااااااااااااااااااااااااااااااا


ايه اكتر آله موسيقيه بتحبها؟؟
الكمنجة و يليها العود ..... هموت و اتعلم حاجة فيهم

فى رايك ليه الذوق و النخوه انعدموا؟؟؟؟
أما عن الذوق .... اللى سهل يتهان سهل يهون عليه غيره
و أما عن النخوة .... ففاقد الشئ لا يعطيه .... وانكسر جوانا شئ .... وليه يا زمان مسبتناش أبريا .... و الله يجازى اللى كان السبب
و الحدق يفهم

ايه الحاجه اللى لو حصلتلك تبقى سعيد اوى؟؟؟

.... لغاية قريب كان أقرب رد عندى
أتجوز


و من بعد ما انكسر جوانا ذات الشئ المذكور أعلاه..... معدش فيه حاجة تفرحنى أكتر من انى أشوف فرحة فى عين أى حد يكون ربنا أكرمنى انى أكون من أسبابها
و يا سلام لو كان من القريبين منى ( والدى ، و الدتى ، اخواتى ، اصحابى )0

بس


تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟

اممممممم .... مش عارف ممكن أجنس عربيات


البحر و لا النيل؟؟؟

البحر

مركب ولا طيارة ؟؟

مركب

مجنون و لا عاقل؟؟
مجنون فى زمانى عاقل فى زمن غيرى


تقرى كتاب و لا تتفرج عليه فيلم؟؟؟
تتفرج على فيلم
ــــــــــــــــــــــــــــــــــــــــــــــــــــــــــــــــــــــــــــــ

و يا سلام عليكم

Saturday, January 12, 2008

سيرة بائعة خضار

في شارع الحلقة توجد بائعة خضار،ام سعيد ،يعرفها معظم اهل الشارع حتي من قبل ان ترزق بابنها سعيد الذي سمته كذلك عسي ان يكون له من اسمه اي نصيب.
و ام سعيد كاي بائعة خضار تمتلك صوتا حيانيا ينشر سمعة الليمون و الطماطم و الخيار في كل انحاء الشارع و هي كاي بائعة خضار تضع الثمار النظيفة الكبيرة فوق سطح القفص تاركة الثمار الهزيلة التعيسة تعرف طريقها الي القاع ، و لأم سعيد اسلوب خاص في الاقناع فهي تجبرك علي شراء اشياء لم تكن تنوي شراءها طمعا فب " الاكازيون" الذي تنصبه بمزاجها او خوفا من " الجرسة" التي ستتعرض لها كرجل طويل عريض يستخسر في اهل بيته " شوية خضار".
الساكنون القادمي في هذا الشارع يعرفون ام سعيد منذ ان كانت متزوجة من سليم " المخلصاتي" ، لم يكن له مهنة واضحة لكنه كان بارعا في الكلام ، يقوم ببعض عمليات السمسرة من آن لآخر و احيانا يختفي لفترات متباينة يعود بعدها بمبالغ مالية و بال رائق و سرعان ما تنفذ الاموال علي روقان البال و لا يتبقي لأم سعيد الا القدر الذي تنجح في اقتناصه بحنجرتها الشهيرة و ملافظها القبيحة.و في اختفاءة من اختفاءات سليم طالت المدة حتي فوجئت ام سعيد بورقتها تزف اليها في فرشتها في قلب شارع الحلقة، يومها سمع الشارع كله تاريخ عائلة سليم المشرّف و خاصة نساء العائلة ، كما نال كل من حاولوا تهدئتها نصيبهم من الاهانات ، تركها سليم و معها ولد و بنت في الاعدادي .
سيد - الابن - كان عايقا من يومه ، طالما ارهق امه بطلباته المكلفة حتي لا يكون اقل من زملاؤه في المدرسة و كانت هي تحاول تدبير الامور بطريقتها ثم اكتشف سيد انه لا يحقق ذاته في التعليم فاقتحم عالم ما خلف اسوار المدرسة و اقتحمه بقوة ، جرب كل انواع المزاج من السجائر و حتي الصنف المفتخر ، و كانت امه دائما تحاول تدبير الامور فحتي بعدما هجرها زوجها كانت فرشة الخضار لا تزال كثيرا ما تفي بالغرض ، و رغم انها كانت تشك بل تعرف بانحرافه الا انها لم تكن تملك الوقت ولا طول البال لتقويمه مع تدبير تكاليف معيشتهم في نفس الوقت ، لكن ما كان يؤثر في ام سعيد - و هي نادرا ما تتأثر - هو تذمر سيد من مهنة امه و خناقاته المستمرة مع رفاقه بسبب حساسيته من ذكرهم لفرشة الخضار و تقليدهم لأمه في مناداتها علي الخضار بصوتها النشاز و مطّها لأواخر الكلمات بطريقة مميزة .
كان يفرغ غضبه كله في وجه اخته زينب التي كانت دائما مكسورة الجناح ، كانت تصغره بعامين، لم يكن لها ابدا رأي في اي شيء فهي دائما " لا تفرق معها" ، و كانت رغم علمها بانحراف اخيها تشعر معه بالامان و تخاف ان تغضبه و تطيعه لاحساسها انه اعلم بالدنيا و انه لو تركهم ستضيع ، حاولت كثيرا ان تلوذ بحضن امها لكنها كانت تستضد دائما بلعن امها لخيبتها القوية في كل شيء ، لذلك حين ارسل سليم الي سيد ليشاركه مع الناس الكبار الذين يعمل معهم و يعيش مع زوجته الجديدة - هذا العرض الذي لم يفكر سيد في رفضه - فضلت زينب ان ترحل معه تاركين امهما تلعنهما و تبكي كثيرا في وحدتها رغم ان كل من شاهدها في فرشتها لم يشعر انها اهتمت لهذا الرحيل ابدا .
المتابعون لأحوال ام سعيد اندهشوا قليلا عندما تزوجت مرة اخري ب " الاسطي " شوقي السواق الذي يعمل علي سيارة نقل صغيرة لنقل الخضار من سوق الجملة الي صغار البائعين و الذي اوقعه حظه للتعامل مع ام سعيد ذات يوم فاعجبه زعيقها و سيطرتها علي المنطقة و كفاحها فقرر في اول حركة ثورية في حياته الهادئة ان يتزوج منها و هو الذي تعود ان يعيش في حاله بعيدا عن المشاكل ، و هي لم تعترض فظل رجل افضل من ظل حائط ، و الاسطي شوقي رجل طيب و كسيب و يكبرها بعشر سنوات و لن يفكر في مغامرات يضيع فيها شقاءه ، و لدهشة اهل الشارع رزقت بسعيد علي غير توقع فهي ليست صغيرة ، و لذلك و نكاية من نساء اهل الشارع فيها دأبن علي تسميتها منذ ذلك الحين ب" الحاجّة" ، تلك التسمية التي فهمتها ام سعيد جيدا و لم تعجز عن الرد عليها .
لم تفرح ام سعيد كثيرا فسرعان ما هزل شوقي هزالا شديدا و اصفر لونه و في يوم تقيأ دما كثيرا و هرعوا به الي المستشفي و هناك و بعد ان سبّت نصف العاملين بالمستشفي افهموها ان زوجها مريض مزمن بالكبد و يحتاج الي علاج طويل الامد يكلفهم كل ما يملكوه و زيادة فعادت به الي البيت ليراقب بطنه و هي تنمو و جسده و هو يهزل و ام سعيد و هي تحمل ولدها معها كل يوم الي فرشتها لتضعه في قفص خضار اعدته له في مكان ظليل وسط فرشتها.
في هذا اليوم سمعت سارينة الشرطة في أول الشارع ، لم تعبأ فهي التي طالما لم يهمها شنبات الداخلية منذ ايام "الهوجة" التي سموها "هوجة الحرامية" عندما خبأت في بيتها اثنان من " العيال بتوع السياسة " لعدة ايام لأن واحدا منهم كان يشبه ابنها الذي كان وقتها مختفيا لعدة ايام كعادته ، حتي عندما اخبروها عن البك الجديد " بتاع المرافق" لم تعبأ كثيرا فماذا سيفعلون بها اكثر مما هي فيه ، لكن السارينة لم تتوقف و استمرت سيارات الشرطة في توغلها داخل الشارع حتي و صلت الي منتصف الشارع و نزل المخبرون يحملون الاخضر و اليابس بحجة شغل الطريق العام ، كل ما طالته ايديهم حملوه ، ام سعيد استقبلتهم بأقذع السباب لكنهم حينما اقتربوا من فرشتها حملت كل ما استطاعت حمله من اقفاص و ساعدها رجال الشارع و لاذت الي اقرب مدخل بيت و هي تولول و المخبرون يحملون كل ما تبقي من الفرشة لكنها اطلقت صرخة شنيعة عندما رأت قفص سعيد محمولا و مطوحا في الهواء ليرقد وسط الكراكيب في صندوق سيارة الشرطة التي انطلقت سريعا بدويّ سرينتها المزعج .
بعدها لم تعد ام سعيد كما كانت ، ارتسمت علي وجهها تلك النظرة الذاهلة التي لم تمحي حتي اليوم ، ظلت موجودة في الشارع تجلس مكان فرشتها القديمة بنفس الثوب الاسود الرث الذي ازداد توحلا و رثاثة و بنفس الفاظها القبيحة تنعت بها اي شخص يعبر امامها و احيانا تقوم لتطارد شخصا ما بسبابها او تقذفه بحجر لكن النظرة الذاهلة في عينيها لم تتغير .
في شارع الحلقة كانت توجد بائعة خضار ، و القادمون الجدد الي الشارع يرون هذه المرأة ذات المنظر الرث تطارد الناس و تشتمهم و ربما يسمعون شيئا من حكايتها من السكان القدامي للشارع

Wednesday, January 09, 2008

سؤال منطقي وإجابة أكثر منطقية




هو احنا بنسرق ليه يا حسن ؟

مش عشان مستقبل أفضل لأولادنا



طلعت زكريا من فيلم حرامية فى كي جي تو