اول تاج البسه

المفروض فى الوضع الطبيعى ان لما الواحد يجيله اول تاج ينباساط بقى وكده .... بس الشعور ده مش عندى خااااااالص.
لان التاج ده تسييح خالص ...... واصلنى من روحى و حبيب قلبى فؤاد .... الله يسامحك يا شيخ
(انت هتحكيلنا تاريخ حياتك انجز يا عم .... خلينا نقرا البقين بتوعك و نمشى)
ا(ايموشن امتعاض) .... حاضر.. ماشى... حقك ياسيدى
نبتدى الاسئله
ايه اللى حيحصل لإيميلك لما تموت؟
تموت ...اولها كده .... وبعدين هيحصله ايه يعنى .... هيتقفل مهو مش أمله ولا عزبه يعنى
اديت الباسوورد لحد قبل كده؟
اه
لو اه كانت علاقتك بيه ايه؟
اختى ... مش قرايب يعنى معرفه من بعيد ..هأ هأ هأ

ومادام ماسألتش مش هقوللك ليه .... كده غتاته
اسمك؟
اسامه محمد عامر محمد عيسى الكبير
شايف صخص نبيه رفع شفته على جنب (مش فاهم يعنى ايه) و بيقوللى ايه الكبير دى ....هرد عليك
تخيل معايا ... الصوره بقت ضبابيه .... و بعدين فى وسطها يطلع مشهد ابيض و اسود لطفل برئ و جنبه باباه
الطفل الدهل اللى هو انا : بابا هو انا اسمى ايه
بابا : مانت لسه قايللهم فوق يابنى ... انجز شكلى بيبقى وحش فى الابيض و الاسود
انا: (بامتعاض) ابهات آخر زمن .... متطلعنيش من المود يابا خلينا نخلص ... كنا فين اه ..... ايه الكبير دى يا بابا
بابا : مش عارف يا حبيبى جدك قاللى كده
انا : ابص لبابا بانبهار و اسكت

بصراحه معنديش رد ابلغ من كده
اسم الدلع اللى مشهور بيه فى وسط اصحابك؟
أث أث
سم سم
أساكه ... (مش عايز تعليقات ظريفه)0
واخيرا الطويل ... مش عشان موضوع الكبير اللى لسه قايله فوق ... لا انا طويل فعلا بس مش لدرجة ان ده يبقى اسم الدلع ... (و تانى بكرر مش عايز تعليقات ظريفه)0
عمرك؟
عمرى بالسنين و اللا عمرى باللى شفته يابنى

ياااااااااه .... كان نفسى أعيش الدور ده من زمان

انا عندشى 21و نص
برجك؟
اه
اممممم
ابتدينا
عادى يعنى كلنا لينا سقطاااات و اللا اييه؟؟
العذراء
..................
اى كلب هيعلق ...انا هقتل نفسى فى ميدان عام (عام فى الميه ..... هاهاهاهاها مش ممكن دمى شربات مسخره) .... هرد عنكو (ايموشن امتعاض)0
مجالك او مجال دراستك؟
مجالى ... اممم حوالى اتنين كيلو متر عشان الاشعاع
هأ هأ هأ
بلا فخر..(عشان فعلا انا مش فخور) طالب بكية الطبببببببب ..... الفرقه الخامسه
شخصيتك نوعها ايه؟
اممممم
جيل كابو
او تقريبا
مازدا فور باى فور

ايه الاسئله دى
مبعرفش اتكلم عن نفسى .... انا شخص بيتوتى جدا ... هش جدا ..طيب خالص مرح فى معظم الاحيان ودوود ( و دود و يرقات ...هى هى هى ) وبشوش ...... والله أعلم
المود بتاعك؟
متقلب ... جدا ...يعنى ممكن ابقى صاحى من النوم زى الفل بس انزل الشارع اكتئب....... كده لوحدى
اوممكن ابقى قاعد فى وسط الناس كويس جدا و بتكلم .... وافتكر حاجه تضايقنى او يحصل تاتش صغير خالص مع حد يعكنن عليه اسبوعين قدام

وقت فراغك بتعمل فيه ايه؟
ياكمبيوتر ...يا صايع بلا مأوى .... وفى كلا الحالتين الوالد بيبقى مش طايقنى
الأكله المفضله؟
البيتزا .... صنية بطاطس فى الفرن ... المكرونه بالباشامل لما بتبقى مخدومه ...... الرز بالشعريه(فقرى ... عارف) الفراخ البانيه مع الكاتشب(عشقى الاول و الاخير)0
الصفات اللى اخدتها من بابا؟
بابى .... آبا .... كتير والله ... الطيبه الزايده ... العصبيه و الخلق الضيق بس اطلع اطلع و انزل على مفيش ..... عادات بيتوتيه كتير .... حبى للناس
الصفات اللى اخدتها من امى؟
الطيبه برضه .... حسن التفكير .... الثقه فى الله .... العقل .... الدم اللى زى العسل (ماما طبعا مش انا )0
اكتر ست حاجات بكرهها؟
الحقد
الغيره
التنافس غير الشريف
الخيانه
الاستهبال الزايد ( ولونى بتخذه مخرج فى كثير من المواقف)
الحكومه بتاعتنا
اكتر ست حاجات بحبها ؟
اهلى و اصحابى وانتو
الصراحه
الصداقه
الدماغ العاليه(مش حشيش يعنى)
عمل الخير لما متشوبهوش شوائب
فيلم حلو:)

الشغل بالنسبه لك ؟
تحقيق ذات ... ده أكيد .... بس لغاية لما ييجى هو بالنسبه لى بعبع
ايه الكمبيوتر و الانترنت بالنسبه لك؟
متنفسى لما ببقى مخنوق او مضايق .... وشويه بشويه بياخد حيز اكبر فى حياتى ..... من غير بكش والله كفايه ان انا عرفتكو .... والله اى حد بعرفه بيضفلى حاجه فى شخصيتى .... ربنا يخلليكوا ليه
(انت هتشحت .... ده ايه الناس دى وبعدين يابنى اذا بليتم فاستتروا ..و.....0)
بص يا كابتن من الآخر كده عشان انا مخنوق من اهلك اساسا .... القاعده دى تسييح عايز تقعد بأدبك اتفضل مش عايز ... علم و امشى .... خلاص
بالنسبه بأه للسؤال الظريف اللى جاى

خمس حاجات محدش يعرفها عنك ؟ ...(حسبى الله ونعم الوكيل فيك يا فؤش) بس مش منولهالك .... هى حاجات أعز اصحابى يعرفوها بس للاسف تاريخ اسود
اولا :0
اختى سافرت السعوديه و طبعا مفيش غير العبد لله اللى هنا لان بقيت اخواتى مش فاضيين .... فقوم عشما فيا طلبت اختى منى اجيبلها معصم .. معصم و هى فى السعوديه ... مانا جايلكو فى الكلام اهه .... اصل هى فى مكه و للى ميعرفش ...بضايع مكه بتبقى مش حلوه أوى ... ما علينا...نزلت رحت لمحل ايشاربات .... كان فيه راجل محترم كده كباره قاعد و كان فى بنت و اقفه بتبيع.... قاملى الحاج على اساس ان راجل لراجل يعنى .... سألته( من فضلك الاقى عند حضرتك معصم اسود) ... ابتسملى الراجل و قام يجيبه ... كان ممكن الموضوع يخلص على كده بس مين ... (من فضلك كنت عايزه كارينا) ده انا كما هو واضح ... كان ساعتها مدينى ضهره فمشفتش تعبيرات و شه ... وقف لحظه ... اسكتش انا ...ابدا ..... (لو مفيش كارينا بلاش) و كانت القاضيه .... وربنا ياجدعان انا بقول اللى اتلقنته مجبتش حاجه من عندى ..... المهم لفلى الراجل و تفحصنى من فوق لتحت ... وانا كالملاك البرئ و فوق راسى الهاله الصفرا دى و طالعلى جناحين بيض ..... زغرلى الراجل الكباره ده و قاللى مفيش عندنا خلص اى خدمه تانيه
مفهمتش معاملته اتغيرت ليه
المهم انى اكتشفت فى النهايه ان كارينا دى عباره عن ماركه للبنات زى جيل كابو عند الرجاله ...... الله يسامحك يا اختى بقى
تانينا :0
الجيران
مفيش حد معندوش بنت الجيران .... بس فى تفاوت .... العبد لله و متفهمونيش غلط .... عندى اتنين جيراننا بنات اصغر منى .... مش هوصف كتير يكفى ان انا اقوللك انى بشم البرفان بتاعهم وانا فى الدور الرابع و هم بيقربوا من البيت ... وماشاء الله ساكنين فوقينا بقالهم 4 سنين و انا ولا انا هنا منفض خالص .... مش عارف ثقه دى و اللا ...احمم ماعلينا
كنت طالع فى مره عالسلم - (يعنى هم بيطلعوا على ايه يعنى ... ايه العيل العتيه ده) ...(ايموشن امتعاض تانى)- بسرعه كعادتى ومش فاكر والله كنت بفكر فى ايه.... المهم اول ماوصلت للدور بتاعنا....لقيت شهقه و وراها (خضتنى يا اسامه ) ..... الكولليكشن بتاع البرفان مع الشهقه مع المنظر.... و الله كان هيغمن عليه ..... تمالكت نفسى و نطقت و دى مبتحصلش الا نادرا ... قلتلها ( يقطعنى ... انتى كويسه ) ... قالتلى ( الحمد لله انت عامل ايه ).... للاسف كنت استنفزت طاقتى فى الكلمتين اللى قلتهم فوقفت متنح شويه و برطمت بكلام وهى طبعا مفهمتش حاجه ... المهم باى... باى...
نزلت هى و دنتنى انا فتره واقف فاغر الفاه مدلدل المفتاح من ايدى مش مستوعب ...0

و مره واحد و على طريقة الفنان(ادى ميرفى) وقفت ارقص على السلم و اقول (قلتلها يقطعنى ...قلتلها يقطعنى ) المهم فقت بعديها من الصدمه و كفيت عالخبر مجور
تالتنا :0
انا واحد من الناس اللى بيحبوا انهم يذاكرو على موسيقى أو أغانى .... بس المشكله عندى فى حاجه انى بذاكر و انا واقف و انى مببقاش متحكم فى اطرافى ..... يعنى لو لاقدر الله الوالد دخل عليه فمره و انا بذاكر لوحدى مشغل موسيقى هيشوفنى فى منظر مشين .... يعنى حبه ديسكو على حبه باليه .... مناظر متسرش خالص
رابعا :0
وانا صغير كنت هُلُقْ خالص مكنش عندى اى وعى بالمكان ولا بالاحداث .... انا فاكر اليوم ده كان يوم وفاة جدو و كانت الدنيا هيصه تحت البيت و كانت اختى الكبيره هى اللى قاعده بيا انا و اختى اللى اكبر منى بتلت سنين ... كان عندى 5 سنين ... كنت لابس تيشيرت عبيط عليه بطه ...اه و ربنا لونه اصفر و ليه جيب قدام مرسوم عليه بطه و مبهوق عليه.... قامت اختى الكبيره تجيب حاجه .... من غير ما أفكر تقولش مبرمج خدت بعضى و نزلت عالشارع و منه على الساحه اللى قدامنا من غير ادنى شعور بالخوف - وربنا لوكان حد منكم شافنى وانا الاكل مبقع هدومى كده كان افتكرنى ابن عم ابو العلا - المهم كملت لغاية شارع العربيات ووقفت شويه ...مش عارف تقريبا مكنتش اخدت قراراى ... هونج كونج واللا مابوتو .... سبحان الله شافنى جارنا مدرس فرنساوى الله يرحمه و اخدنى ودانى عالبيت .... و اللى يغيظك انى رحت معاه دون مقاومه ... عادى يعنى كان ممكن اى حد يعملها مكنتش هقول لأ
عتيه عتيه يعنى
خامسا :0
و انا فى ابتدائى كان فى واحد بييجى ياخدنا بعربيته .... المهم اتخانقت مع البنت اللى فى العربيه عشان مش عايزانى ارسملها رسمه ... عادى يعنى مهو مش عافيه .... لكن ازاى .... قفلت معايا .... قمت قايل مش مروح معاكو الراجل يتحايل عليا ابدا .... الناس اللى فى الشارع قلقلو منه كانو فاكرينه هيخطفنى .... فكبر و روح و قال يتصل ببابا ييجى ياخدنى .... مش عارف كنت عاند على اساس ايه ... المهم روح و قعدت انا لوحدى فى الشارع لحد الساعه 5 و الدنيا كانت ابتدت تضلم .... كنت واثق أوى انه هيرجع و شويه بشويه ابتدت الثقه تتلاشى و الحمد لله عطف عليه دكتور كان مروح بالعربيه بتاعته من جنب المدرسه و خدنى روحنى .... و كان يوم اغبر ان دل على شئ انما يدل على انى هلق اصيل مش تقليد
طولت عليكوا معلش بس أول تاج بأه
وكلمه لحبيبى فؤاد .... (الله يخرب بيتك زى ماخربت بيتى )0
و احب اباصى التاج ده لكل متكاظيى البلوج و كل اللى عايز يسيح لنفسه .... بس خلاص