لـبــنـان

بَعْدَك على بالِي

قبل ما نتكلم في أي حاجة أتمنى نكون متفقين على كام حاجة كده

------------------------------------------------

أولاً: إن شتيمة الحكومات لا عمرها بتقدم ولا تأخر.. بالعكس هانتحاسب على كلامنا ده قدام ربنا و و على إننا وقفنا مكاننا نحتج و خلاص و ربنا قال و الكل بيردد الآية دي مؤخراً...إن الله لا يغير ما بقوم حتى يغيروا ما بأنفسهم
ثانياً: كلمة مشروع ممكن ُتطلق على أي فكرة أو اتفاق على تنفيذها0
ثالثا: كلنا موجوعين من الحاصل في لبنان و غزة الأيام دي.. اشمعنا اليومين دول؟. يمكن عشان وداننا اتعودت للأسف على سماع أخبارالانفجارات و العدوان المذابح.. و جه موضوع لبنان زي العشرين قلم على سهوة
رابعا: اننا كشباب مصري بنحب لبنان..بس مش هانروح نحارب..لأسباب تتعدد منها أهالينا.. وللا أنا غلطان؟.. و لأن الجهاد مش بس سلاح.. مش هانخوض في تفاصيل و كلكم مفهومية
----------------------------------------------

مشروع : لبنان...بعدك على بالي

:الخطة

التواصل
نسأل ع الشباب اللي زينا اللي تحت الحصار... نحسسهم احنا بنعتبر نفسنا تحت الحصار زينا زيكم ..أتمنى كلنا سواء نعرف ناس من لبنان أو فلسطين أو مانعرفش... نقوي بعض و نسأل عليهم في الظروف دي... بالتليفون.. بالإيميل.. ع النت.. في المنتديات ..... نعرض فكرة مجنونة للمقاومة... ننسخ مبادئنا دي في كل مكان ع النت و في جلساتنا مع الهتمين... نهتم بيهم..نحاول نخليهم يبتسموا في شدتهم...مانمصمصش شفايفنا و نقول قلبنا معكم و يا ريت باليد حيلة دا حكومات كذا وكذا 000
نهتم بيهم و نفضل كده حتى بعد انتهاء الحرب نشد على ايديهم و قلوبهم... كلامنا يكون من قلبنا..مش شعارات وبس... الشدايد بتقوي و بتعرف معادن الناس... ما نستناش حكومتنا تاخدلنا موقف احنا قادرين ناخده بطريقتنا... (المصري عمره ما كان خاين)و بما ان ده بلوج ف مافيش أسهل من الوصول لبلوجات لبنانية نقف جنب أصحابها.
....طريقة تانية....قريت في موقع عشرينات فكرة غريبة... ممكن الواحد فينا يطلب مفتاح النداء الآلي للبنان و بعده أي رقم عشوائي لحد ما حد يرد عليه و يتواصل مع الأسرة اللي طلبها دي… (تخيل وقع مكالمتك)0نوعدهم اننا هانشاركهم و هانتحمل معاهم الخساير اللي خسروها في الحرب دي...
الخساير المعنوية قبل المادية... إحنا مش أغراب عن بعض.احنا جيران ساكنين في نفس الطابق... اتربينا مع بعض و الزمن عمره ما هايكبر حد على التاني.
الإعتصام
هي فكرة زميلي المدون متكاظي صراحة... اعتصام سلمي أمام السفارة و القنصلية اللبنانية (وبلاش اسرائيل)... رسالة متحضرة للبنانيين مفادها اننا معاكم رغم كل شئ... أضيف للفكرة مكان شركة السياحة في ميدان التحرير دي أي مكان يمت بصلة للبنان.. و ان يكون من طقوس الإعتصام اشعال شموع و قراءة قرآن على أرواح الشهداء
(و نتمنى من سكان العاصمة القاهرة الإهتمام بالنقطة دي)
المقاطعة...بجد

أمريكا النهارده بترفض وقف اطلاق النار و السِتْ كونداليزا بتعتبر اللي حاصل آلام مخاض لولادة شرق أوسط جديد وهاتبعت قنابل موجهة لدعم اسرائيل

التبرع
ودي سهلة و ارقام الحسابات في كل موقع نت أو قناة فضائية و كل جريدة مصرية و عربية
فكرة التيشيرت
ماعرفش هاتلاقي تأييد وللا لأ.. بس لازم أعرض شكل البادج اللي نقلته من مدونة لبنانية لشاب اسمه مصطفى

لو قربنا من بعض صح دلوقتي.. هاتفرق معانا كتيييير في المستقبل... اللي حصلنا دلوقتي بسبب إن كل واحد قفل عليه بَابُه و دخل الغريب في شئونه و الغريب وقعه في أخوه و جاره

في النهاية... أستحلفكم بالله... مش وقت خلاف
يا رب نكون ما نسيناش حاجة و ربنا يوفقنا و يرفع عن أراضينا أذى المعتدي الظالم من الخارج و الداخل

Put ur Signature & Save the Lebanese Civilians:

http://epetition.net/julywar/index.php

moro