لسه حاصل من 5 دقايق

الساعه دلوقتى 5 ونص لسه سامع واحد فى الشارع بيزعق بصوت عالى جدا(مش انا اللى يتعمل معايا كده)وبما انى بحب اتفرج على الخناقات-هوايه مش اكتر-طلعت البلكونه اتفرج0

وقفت لقيت الشارع فاضى هس معادا راجل محترم وشكله كويس فى التلاتينيات تقريبا0عدت عينى عليه بسرعه وانا بدور على مصدر الصوت اللى سمعته من شويه مش لاقى حد بيتخانق بدأت اكدب ودانى وان دى هلوسة عصر الشفافيه وامن الدوله0

وفجاه(سامعنى بقولك ايه يا بن ال00000)اعتذر عن اكمال الجمله لدواعى اخلاقيه ليس الا0هو نفسه الراجل المحترم_واللى هيفضل محترم برضه فى نظرى_قالها مشوحا بيديه فى الهواء مع سيل من الكلمات التى لم اسمع تفاصيلها من ثورة انفعاله وحشرجة الكلمات فى حنجرته وتساقط الدموع من عينيه0

وقفت مبهوتا بعض الشىء حتى اختفى فى اخر الطريق وانا اسمع كلماته من الشارع الاخر0بعض الماره والواقفى فى البلكونات مثلى اسمع تعليقاتهم الساخره(اجرى يابابا تعالى شوف المجنون ده)نظرت لهم بقرف ودخلت مره اخرى فقررت ان اكتب تلك المدونه اعلانا منى عن تعاطفى مع ذلك المقهور الله اعلم من مين ما احنا كلنا مقهورين ولكن مازاد المى له انه اتقهر حتى من الناس اللى مفروض تحس بيه0

طب هو عنده دم وانفجر من كتر الضغط النفسى عليه الاولى ان احنا نتكسف لما نشوفه مش يبقى مثار تعليقات غبيه0

يا ايها المقهور اعلن باسمى وباسم شرفاء ذلك الوطن اسمى اعتذراتى لك فسلبية ذلك الشعب الذى لايتورع ان يفتك بأخاه المظلوم ويقبل يد الظالم هى التى ساقتك لان تفعل ذلك ارجو ان تقبل اسفى000000 لعل ياتى يوم من الايام يأتى من يتأسف على شخص اخر عندما افعل مثلك0