ازيكو يا جماعة..
حبيبى وصديقى متكاظى .., عرفكم يعنى ايه مكاظية .., الاول انا عايز اقول احنا عاملين البلوج دى ليه ؟
بما اننا شباب متكاظى ,وتعبانين فى حياتنا , ومش عارفين احنا بنتكاظى ليه ؟!! .., ولا لصالح مين ؟!!
قررنا نشوف مكان نطلع فيه كل اللى جوانا .., ونوريه لاى حد تانى شايف انه متكاظى زينا .., ومش بعيد نعمل مجموعة كبيرة للمكاظية .., وشوية وممكن نعمل حزب المكاظيو ويكون لينا الحق السياسى اننا نعبر عن اللى جوانا .., ومش هقولكم بقى اننا لو بقينا حزب ساعتها ممكن نختار واحد يرشح نفسه فى انتخابات الرئاسة والوكاسة .., واحتمال كبيير ان الشعب المتكاظى (زينا طبعا ) يقف ورانا احنا المتكاظين .., علشان نعمل ....نعمل ايه بقى .....نعمل وفد كبيير مننا يقابل الخديو ويحاول يقنعه بمطالب الشعب .., انا كنت بهزر .., البلوج ده ملوش علاقة بالكلام اللى انا قلته (يمكن يكون متراقب هو كمان )., احنا شباب زى اى حد فى مصر دلوقتى .., نفسه يعيش .., نفسه يحب ويتحب .., نفسه يتعلم حاجة بجد .., بنحب نقرى .., ساعات بنكتب.., اكيد تعبنا فى حياتنا (علشان كدة بقينا متكاظين ) واكيد حاجات كتيير اوى مش عجبانا ونفسنا نغيرها .., البلوج ده لينا .., ولغيرنا .., اى حد عايز يكتب اللى هوه حاسس بيه .., يبعته معانا (ميخافش هننشره من غير رقابة ونتبعت احنا مش مهم ) ..,أى حد شايف انه متكاظى زينا وعايز يفضفض .., مش هتلاقى مكان احسن من هنا .., احنا عبارة عن ودان كبيرة .., كل وظيفتها انها تسمع حضرتك (شايف الذوق ) ..
وبما انكم عارفين ان المكاظية مجالها واسع فأى حد من اللى انا هقولهم دول يشرفنا انه ييجى معانا :
لو زهقان وطهقان من دنيتك (بلوج متكاظى )
لو فرحان زيادة عن اللزوم (بلوج متكاظى )
لو عايز تتجوز وابوها مش راضى (بلوج متكاظى )
لو زهقان من المذاكرة (بلوج متكاظى )
لو مبتذاكرش خالص (بلوج متكاظى )
لو حاسس انك ملكش لازمة فى دنيتك وانك عالة (بلوج متكاظى )
لو انت مصرى (بلوج متكاظى )
لو انت مش مصرى (بلوج متكاظى )
لو بتتكلم فى السياسة (بلوج متكاظى )
لو عندك موضوع حلو وعايز حد يقراه (بلوج متكاظى )
لو عايز تقرى كلام شباب زيك وتشوف بيفكرو ازاى (بلوج متكاظى )
لو بتحب نانسى عجرم (بلوج متكاظى يرحب بيك )
وبالمناسبة صحيح .., لو فيه بنت بالصدفة كانت تايهة ,وغلطت ودخلت البلوج .., فاحنا بنرحب بيها معانا .., البلوج ده لأى متكاظى ..,حتى لو كانت بنت .., احنا مبنعملش حاجة عيب .., المكاظية شرف .., المكاظية امانة فى رقبتنا كلنا .., المكاظية حركة شاملة .., المكاظية فى دمنا (هاى هى ) .., وعلشان كدة يشرفنا ان اى حد ييجى معانا
فى النهاية انا بحزركم جميعا .., احنا مجانين .., ومبيهمناش حاجة فى الدنيا دى فى سبيل مكاظيتنا ..
وفى النهاية بحب اسأل السؤال الأبدى اللى فى دماغنا كلنا :
هوه احنا بنعيش علشان نتكاظى ؟!! .., ولا بنتكاظى علشان نعيش ؟!!
0 ليف يور كومنت هير بليز:
Post a Comment