المدون كويلهو

أمبارح مرت سنة على بداية البلوج0

كنا محضرين بوست نتكلم فيه عن المناسبه دى0

بس كالعاده جت ظروف منعت الموضوع ده0

التدوين بيزيد يوم عن يوم

وكل فتره نتفاجىء بوجود مدونه تدخل فى نطاق المفاجآت من مدونة الرئيس الايرانى احمدى نجاد والفنان خالد الصاوى والكاتب علاء الاسواني (سبت الكسل وجبت اللينكات بتاعتهم)0

لكن ان المدونه تكون لباولو كويلهو فده موضوع مختلف مع احترامى وتقديرى للسابق ذكرهم لانى اعتقد ان حركة التدوين اكتسبت شهره فى مصر بما اخذته على عاتقها من مواجهه للأستبداد السياسي للمخلده تعديلاته والباقيه سيئاته وابتساماته مع اصدقائنا الاسرائيليين كما يحب ان يطلق عليهم المستبد مبارك الاول و المستهبل جمال الثانى لكن من الواضح ان تقديراتنا اصابها الخطأ ووجدنا مدونته التى اطلق عليها محارب النور وقام بعض من معجبينه بترجمتها للعربيه فى هذا الرابط0

وإمعانا فى المفاجأه يوجد هنا آخر رواياته ساحرة بورتوبيللو وممكن تعلق عليها ودار النشر هتترجم تعليقك ليه بناءا على طلبه0

اللى فهمته انه اكتشف تسريب الروايه على النت فسلم أمره لله ودخل فى العالم ده وعجبته فكرة أن الناس تنقل لبعض كل اللى بيحبوه من روايات وافلام وموسيقى0

باولو كويلهو ساحر الصحراء ومحارب النور إسمحلى أقولك انك بنى آدم رايق0