تاج على راسى

دعاء غريب زنقتنا يا جدعان وبعتتتلنا التاج

وزى ما قالت هو دور وصايب الكل

وادينا حضرنا القلم الفرنساوى وبرينا القلم الرصاص و جيبنا المسطره والوالده بتدعى وما فاضلش غير ورقة الاسئله

حاسب من القلم الاحمر يا محترم

س1:هل انت مستكيف من مدونتك شكلا و موضوعا؟؟؟

والله موضوعا انا راضى عنه اما حكاية شكلا دى فليس فى الامكان اكثر مما كان0احنا كنا عاملينه الاول بمبى بس حسينا ان مواضعينا غامقه فضربناها كحلى0000بس مرحلة انى مستكيف دى لسه عليه سنه0

س2:هل تعلم اسرتك الصغيره بأمر مدونتك الصغيره؟

لا00اصلهم متوجسين خيفة منى اساسا هقولهم انى عامل بلوج ع النت هتبقى موال وابعد عن السياسه يا حبيبى 00ففضلت اشترى دماغى

س3:هل بتتكسف تقول لاصدقائك على مدونتك؟

لا ابدا00انا مش شايف مشكله00تقريبا صحابى كلهم عارفين

س4:هل شقلبت المدونه حياتك للاحسن؟ ادينى مثال

اه طبعا لانى كنت فى الاول بهرى وانكت مع نفسى دلوقتى فيه بشر بهرى وانكت معاهم00يعنى وفرت عليه تمن كشف الدكتور النفسانى

مش عارف كلمة ادينى مثال فكرتنى بفيلم عوكل اديلوه سلاح

س5:هل تكتفى بفتح صفحات من يعقبون بردود فى مدونتك؟ولا مقضيها وسارح سواح فى مدونات خلق الله؟

طبعا بفتح صفحات اللى بيردوا..واحيانا بسرح...واحيانا ما بفتحش خااالص ودى بتحصل لما ما بكون مخنوق من الدنيا

س6:ماذا يعنى لك عدد الزائرين ...هل تهتم بوضعه فى مدونتك؟

جينا للاحراج00والله كنت ناوى اظبط البلوج وادلعه واركب عداد زى التاكسى واجنط اللينكات والذى منه 00بس تقولى ايه فى الكسل وقلة الوقت00بس متهيألى كل ما يزيد الناس اللى بتطلع على مكاظيتك فى الحياه كل ما يكون احسن0

س7:هل حاولت تخيل شكل اصدقائك المدونين؟

ما حاولتش00بس لو هنشوفهم يبقى احسن

س8:هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

السؤال ده مفروض ما يتسألش اساسا لان شهرة التدوين جاءت من انغامسه فى العالم اللى حواليه مش انفصاله

س9:هل ترى فائده حقيقيه للتدوين؟

هى نوع محترم جدا من الصحافه الشعبيه بيختلط فيها السياسه والادب والفن والثقافه فى منظومه جميله وخصوصا انها ازدهرت مع تنامى قوى سياسيه شعبيه زى حركة كفايه و شايفنكم ودورها المهم فى ازمة القضاه والاصلاح الدستورى جعل ليها فائده كبيره جدا خصوصا ان فيه كتير من المدونين كان بيشارك فى المظاهرات و حركات التغيير 00يعنى التدوين مرتبط بالشارع و الناس وده اللى بيديه قيمته الحقيقيه

س10:هل يزعجك وجود نقد فى مدونتك؟ام تشعر انه ظاهره صحيه؟

والله احنا بنرحب بالنقد ومابنزعلش علشان احنا عالم ديموقراطيين جدا00وعندنا شفافيه جدا00وفيه اشراف قضائى على البلوج

انت من حقك تعترض وان من حقى احطك فى السجن(جمله لعادل امام فى المنسى)0

س11:هل تخاف من بعض المدونات السياسيه وتتحاشاها؟هل صدمك اعتقال بعض المدونين؟

اخاف ليه000انا لابس استك منه فيه

لا طبعا بالعكس اللى خلانى ادخل عالم التدوين هى المدونات السياسيه 00اما اعتقال المدونين فلا صدمنى ولا حاجه 00شىء متوقع

س12:هل فكرت فى مصير مدونتك حال وفاتك؟

ليه الفال الوحش ده

مافكرتش بس يتهيألى ان فيه حداشر واحد غيرى هيكملوا..اه حاكم احنا عزوه والعدد فى الليمون ربنا يخليهوملى0

س13:تحب تسمع ايه؟

موسيقى الف ليله وليله بعود نصير شمه

عقبال ما عبد الرازق(اولد متكاظى)يفتكرنى ويجيبها

انتهت الاسئله مع اطيب التمنيات بالتوفيق