مرحى للأوغاد

افرحوا يا جماعة .. قانون الطوارىء اتمد سنتين كمان .., لحد ميخلصوا قانون الارهاب .., ومن طوارىء لارهاب يا قلب لا تحزن

الحكومة شايفة ان الشعب المصرى مبيعرفش يعيش حر .., مبيعرفش يعيش من غير محد يديه على قفاه -سورى عالاسلوب - .., والظاهر ان عندها حق ., هتعمل فينا ايه اكتر من كده .., ده انا بيتهيألى اننا صعبنا عليهم من كتر محنا ساكتين ومبنعملش حاجة .., وهنعمل ايه يا حسرة .., حسبى الله ونعم الوكيل .., قانون الطوارىء يا سادة اتمد سنتين كمان .., قال ايه علشان مصر مليانة ارهابيين .., بس انا مبسوط يعنى علشان السيد الدكتور النظيف قال انه هيستخدم مع الارهابيين بس .., الراجل عداه العيب يعنى ., وفى سؤال للدكتور مفيد شهاب الدين رئيس لجنة وضع قانون الارهاب .., قالوله قانون ايه اللى ياخد سنتين ده بتعملو فيه ؟؟!! هو قانون جملى ؟؟.., رد سيادته قائلا ..., انه موضوع مش سهل .., لانهم لازم يعملو لجنة تحط القانون ولجنة تانية تشوف القوانين اللى بره ولجنة تالتة تراجع عليهم .., ده غير بقى -اتفرج يا مؤمن - انهم لازم يغيرو الدستور كمان علشان خاطر القانون ده .., ليه بقى ؟ .., قلتولى ليه .., قالك ان الدستور فيه شوية مواد حقيرة بتدعو الى الحرية زى المادة 42 اللى بتقول ان الحرية الشخصية مكفولة للجميع وانه لا يحق القبض على اى مواطن او تفتيشه او التنصت عليه .., ولا يحق القبض عليه الا فى حالة التلبس ولا يحق تفتيشه الا باذن مسبق من النيابة او اللقضاء -خيال علمى مش كده .., بقى ده موجود فى دستورنا ؟!!- وقال سيادته ان مفيش دستور فى بلاد بره فيه الكلام ده .., ازاى يتحط الكلام ده كله المقيد لحريات امن الدولة فى دستورنا المصرى .., احنا احسن من بلاد بره ولا ايه ؟!! .., يبقى احنا علشان نعمل قانون الارهاب لازم نلغى المواد الحقيرة اللى فى دستور 71 اللى بيسموه دستور الحريات .., علشان نعرف نقبض عالارهابيين يا جماعه .., وهمه بيوعدو انهم ميستخدموش قانون الطوارىء فى فض المظاهرات او نفخ المتظاهرين لا سمح الله .., او فى الاشتباه فى اى حد ماشى فى الشارع بعد الساعة 10 بالليل -ونفخه ايضا - المعنى واضح يا سادة .., الحكومة بتقولكم .., روحو موتو احسن .., انتو عايشين ليه ؟!!.., مستحملين ازاى ؟؟!! .., فلتندثرو ايها الاوغاد من تطلقون على انفسكم لقب المصريين ..حلت عليكم لعنات السماء ..والارض ..وأمن الدولة !!