Wednesday, September 12, 2007

رمضان جانا .. كونوا معانا







كل سنة واحنا كلنا طيبين



يارب ايامنا وليالينا فى رمضان تعود علينا بخير



ونجتمع فى الدنيا فى رسالة سوا .. ونجتمع فى الآخرة فى الجنة بردوا سوا



قولوا آآآآآآآآآمين

Wednesday, September 05, 2007

س و ج

أول مره أخش النت من مده كبيره
طبعا مش هتكلم فى امتحانات وايه اللى حصل وايه اللى جرى لان دى شئون داخليه تناقش على مستوى الاسره ولا داعى لنشر غسيلنا النضيف على الناس0
بجملة أن الواحد فى فترة الامتحانات مهمته الوحيده انه يجاوب فدى احسن فتره الواحد يرد فيها على تاجات خصوصا انه ساعتها هيبقى فى فورمه كويسه يجاوب فيها من غير تصحيح و درجات0
اشكر جدا باش مهندسه مى على توجيهه للمتكاظين و نردهالك قريب لما نخلص بس :)
على فكره التاج ده من تأليفها يعنى انتاج خاص وحقوق الملكيه محفوظه وعلى المتضرر اللجوء لنقابة المهندسين
لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟اشمعنى العصر ده؟؟
قبل ما اعيش فى اى عصر لازم اخطف رجلى للعصر الفاطمى كده احضر رمضان فيه واشوف المدفع والكنافه فى اول انتاج ليهم اما بقى العصر اللى اعيش فيه فهو عصر الوكسه والعبور الى ما بعد المستقبل فى عهد الحاكم تامر جمال مبارك علشان لما اشوف فيلم محمد سعد اكركع وهو بيقول الله يلعن اللى جابوا ابو ابو ابوكوا0
اول اولويه فى حياتك...عيلتك ...شغلك و لا اصحابك؟؟؟
الاولويه فى حياتى لحياتى بما فيها عيلتى وشغلى واصحابى والانسانه اللى هرتبط بيها اينعم الواحد هيبقى على كذا حبل بس الله المستعان0
ايه اكتر حاجه بتحبها فى رمضان؟؟؟؟
القعده فى بلكونتنا قبل المغرب و الشوارع فاضيه والناس بتمد علشان تلحق الفطار وصوت قرآن المغرب بصوت الشيخ عبد الباسط طالع من الراديو والراجل اللى بيقول مدفع الافطار اضرب بووووووووووم
اوصف ليا اجمل فطار ممكن تفطره؟
والله انا مش أكيل قوى يعنى انسان صديق للبيئه ههههههههه
بس عموما يعنى حلاوة الاكل فى اللمه مش مهم ايه اكتر من انه مع مين وفين
لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
ما تمناش ابدا انى اكون حاكم الواحد مش حمل مسئولية انه يتسأل عن كل الناس اللى فى رقبته وتحت حكمه لكن لو حصل فالواحد يتمنى انه يكون فى عدالة الفاروق عمر وهطمن انى حاكم عادل لما الفقير و الغنى يبقوا قدام الحق واحد وهحاول جاهدا انى اخلى الفقرا يصيفوا فى مارينا0
اللى بيبوظ الحكام ...نفسهم و لا الشعب و لا الحاشيه المقربه؟؟؟
اكيد انفسهم اولا0 سلطه نفوذ جاه وقوه وعلى راى المثل الشعبى اللى يلاقى دلع وما يدلعش واحنا الحمد لله مريحين جدا واخرنا كلمتين نقولهم فى قعده
شعب حبوب قوى يعنى لكن ما ينفعش نلوم نفسنا كتير اصلها مش ناقصه شعب ما كانش لاقى ياكل دلوقتى لا لاقى ياكل ولا يشرب ونحاول نوعيه ساسيا ونقوله بيع بنوك وخصخصه وفساد سياسى واقتصادى وتعليم وصحه معتله مش هيفهم ولا هيسمع غير لما احتياجاته كانسان تتوفى فى الزمن ده والوقت ده ثورة شعب مصر هتكون ثورة جياع وبطاله وفقر
اما بخصوص الحاشيه فهم ذباب ياتى على جيفه0
مين اكتر اعلامى مصرى بتحترمه؟؟؟
حمدى قنديل
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟؟
لم اقرأه ....دم دم دم تش
لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
وانا صغير كان نفسى اطلع سواق قطر مش عارف ليه
لكن لو بايدى انا كان نفسى ابقى عازف مؤلف موسيقى كاتب صحفى الحاجات اللى فيها ابداع بحبها وبحترمها قوى
تانى بلد تتمنى تعيش فيه بعد مصر ايه؟؟؟
البرازيل
بحب وش ناسها المبتسم دايما......عموما يعنى اى دوله من دول امريكا الجنوبيه
اوصف ليا ترتيبات اجمل فرح ممكن تحضره ؟
مكان فيه خضره وميه وعريس وعروسه بيحبوا بعض ودماغهم بايظه وسعدا و الناس فرحنالهم و ممكن بوفيه مفتوح علشان الرجاله تاكل بس هههههههههههههههههههه
بتراعى كلام الناس و القيل و القال؟؟؟ لو اه او لو لا قلى ليه؟؟؟
مش فى كل الاحوال...لكن اللى يحكم الغلط والصح لكن فى النهايه مساله نسبيه
صحيت ملقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟؟
جداااااااااااااااااااااااااااااااااا
السعاده هى.....؟
راحة بال...حد يخاف عليك....كوباية قهوه دافيه والدنيا برد ومغيمه
عندك امل؟؟؟ اسبابك؟؟؟
أكيد............علشان اقدر اعيش
لما بتحب تهرب من كل شىء بتروح فين؟؟؟؟
أى حته مايكونش فيها صوت ناس مكان هادى و مضلم لكن الصوره المثاليه قدام البحر فى اسكندريه
امتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟
لما اى طفل صغير يوقفنى فى الشارع ويقولى الساعه كام يا عمو
لما بتعمل عمل خيرى بيكون ايه هو دافعك الاول؟؟؟
اكيد الواحد بيبقى طمعان فى ثواب ربنا وطبعا الاحساس انك ادخلت السرور على حد بيبقى طعمه حلو

بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟
لا.......وما بطقش منظر ست بتشربها وما بطقش اكتر واحده تقولى اشمعنى انتوا واننا متساويين وتحولها لقضية حقوق مرأه
بتعرف ايدك اليمين من الشمال ازاى؟؟؟؟
سهله خالص ايدى اليمين فى الجنب اللى فيه رجلى اليمين وايدى الشمال فى الجنب اللى فيه رجلى الشمال
ايه اكتر آله موسيقيه بتحبها؟؟
الناى والكمان
فى رايك ليه الذوق و النخوه انعدموا؟؟؟؟
اكيد ما انعدموش....بس كترت بجملة بقى الانحطاط السياسى والثقافى والاخلاقى
كل أمه ليها فترة اضمحلال متهيألى احنا فيها دلوقتى
ايه الحاجه اللى لو حصلتلك تبقى سعيد اوى؟؟؟
أفتح كيس المينى مولتو الاقى فيها ست قطع بدل خمسه ... اسامه لقى سبعه قبل كده
تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟
بيت على قدى مع واحده أحبها وتحبنى
البحر و لا النيل؟؟؟
بحر
مركب و لا طياره؟؟؟
طياره
مجنون و لا عاقل؟؟
عاقل
تقرى كتاب و لا تتفرج عليه فيلم؟؟؟
أقراه الاول وبعدين أشوفه فيلم
بتمرر التاج لمين؟؟؟
كل المتكاظين
وكل واحد اتمنى ان الاشاعه تطلع صح ههههههههههههههههههههههههه