لو كل واحد فينا سأل نفسه... مين هما أعز الناس بالنسبة ليه ؟؟ أكيد الأجابة حتختلف...ماما... بابا... جوزي ... مراتي... ولادي ... أخويا... أختي... صديقي ... صديقتي... خالي ... خالتي ...عمتي ...عمي ... جاري। أكيد كل دول من أعز الناس بس لو فكرنا بعمق أكتر هنكتشف ان في حياتنا ناس هما لينا من أعز الناس مع إننا عمرنا ماشوفناهم ولا كلمناهم!!! بس عشنا معاهم مع أرائهم مع أفكارهم مع كلامهم مع صوتهم । أكيد أثروا فينا و لو بشكل غير مباشر, ... مفكرين ,مؤلفين, ملحنين ,علماء ,شعراء ,ممثلين و مطربين. لأنهم في حياتنا و في وجداننا أكيدهيكونوا دايماً حبايبنا أعز الناس
ده مش كلامي انا علي فكرة ده كلام في بلوج
أعز الناسجبت الكلام عشان ناوية اتكلم علي حد من أعز الناس دول......من كام يوم كنت بتفرج علي فيلم
خللي بالك من زوزو طبعا جه في دماغكم السندريلا والواد التقيل والكلام ده
لكن انا ناوية اخيب ظنكم واتكلم علي حد تاني خالص
ناوية اتكلم علي تحية كاريوكا
فنانة من اكثر الفنانات اللي تستمتع وانت بتشوفها سواء كانت بتمثل او بترقص ايام ما الرقص كان لسه بخيره ولا مؤاخذة يعني
مفتكرش اني شفتها مرة بترقص بأبتذال
كانت فنانة بجد
الفنانة دي بقي في الفيلم ده كانت بتمثل جزء كبير من حياتها بجد .....أم حنينة جدا وفنانة كبيرة ومبتتنكرش لفنها زي تحية بالظبط في الحقيقة...
بحب اشوفها في الفيلم وهي قاعدة علي الكنبة وحواليها البنات بتعلمهم الرقص تحس انها ملكة والكل عايز ينال اعجابها
بحب أشوفها لما بتاخد سعاد في حضنهالما تيجي تراضيها بعد ما تزعلها
بحب اشوفها بتخاف علي سعاد
حتي بحب اشوفها وهي بترقص في الحفلة وهما بيتريأو عليها وهي بتقول ان ده شغلها ....بجد عينيها بيبقي فيها كلام كتير ووشها بيترسم عليه اكتر معاني الحزن الحقيقية ...بحس انها بتتحسر علي زمنها اللي فات
،لو اتكلمت علي تحية هتكلم كتير علي فنها وعلي حياتها ....وعلي فكرة تحية كان ليها نشاط سياسيا القي القبض عليها أكثر من مرة بسبب نشاطها السياسي السري ، ...
لكن انا هنا بتكلم عليها كفنانة في فيلم أبلغت فيه تمثيلا وتعبيرا
تحية لاجمل وأعظم تحية ....يكفي اني اقول اني لما بفكر في الفيلم بنسي شقاوة سعاد وحلاوة حسين وافتكر حنية وعظمة تحية كاريوكا
وياريت كل واحد فينا يفتكر علي الأقل واحد من أعز الناس دول....ويقولنا عليه
